बीरगंज । परिवर्तन सम्भव छ हाम्रै पालामा । ‘हामीले चाहेको परिवर्तन हामीबाटै सम्भव छ’ भन्ने मूल नाराका साथ ठाकुर राम बहुमुखी (ठा.रा.ब) क्याम्पस, बीरगंजको स्वतन्त्र विद्यार्थी युनियन (स्ववियु) निर्वाचनमा सुधान्सु चौरसियाले सभापतिमा र मेघराज यादवले सचिव पदमा स्वतन्त्र उम्मेदवारी दिएका छन् । उम्मेदवारी दर्ता गराउँदै उनीहरुले क्याम्पस, विद्यार्थी र शैक्षिक क्षेत्रको समुन्नत विकासका लागि आफ्नो एजेन्डा राखेका छन् ।
यसैगरी कोषाध्यक्ष ओमकुमार दास, र सदस्यहरुमा अनिल प्रसाद यादव, सुजित महत्तो केवट, धिरज पटेल, नरेन्द्र प्रसाद साह तेली, राकेश साह कानु र मिथलेश कुमार साहको उम्मेदवारी दर्ता भएको सभापतिका उम्मेदवार चौरसियाले बताए । यसैगरी समानुपातिक सदस्यतर्फ अरविन्द गुप्ता, कृष्णमोहन यादव, बल्ली चौरिया, सरोज महरा, मन्जेश यादव, किरण कुमारी, अमन दिप महरा, कारण चौरसिया, अर्चना गुप्ता र अंशु गुप्ताको मनोनयन दर्ता भएको छ ।
ठाकुर राम बहुमुखी क्याम्पसको स्ववियु निर्वाचनमा चौरसिया र यादव समुहको स्वतन्त्र उम्मेदवारीले चुनावी माहोल तातेको छ । राजनीतिलाई शिक्षाबाट अलग राख्ने उनीहरुको प्रतिबद्धताले विद्यार्थीहरूबाट सकारात्मक समर्थन प्राप्त गरिरहेका छन, जसले परम्परागत दल र तिनका भात्रृ संगठनहरू दबाबमा परेको देखिन्छ ।
बिधार्थीको हकहितको लागि सधै आवाज उठाउने यी समुहका उम्मेदवारहरु दैनिक क्याम्पस आउने र वास्तविक समस्या संग एकदम परिचित रहेका र चुनाव जिते पछी त्यसको कार्यान्वयन गरिने तथा दलीय राजनीतिको अन्त्य गरी योग्यतालाई पदाधिकारी नियुक्तिको आधार बनाउने, छात्रवृत्ति कार्यक्रमलाई प्रभावकारी बनाईने, छात्र र छात्रा वासलाई सुबिधा सम्पन बनाउने, विपन्न विद्यार्थी अक्षय कोष स्थापना गर्ने, मानसिक स्वास्थ्यका लागि परामर्श केन्द्र खोल्ने, डिजिटल पुस्तकालय र निःशुल्क वा सुलभ इन्टरनेट सेवा उपलब्ध गराउने तथा गुणस्तरीय पढाईको लागि बढी ध्यान दिने जस्ता एजेन्डा अघि सारेका छन् ।
सूचना प्रविधिको क्षेत्रमा विभिन्न आईटी कम्पनीहरूसँग सहकार्य गर्दै तालिम, कार्यशाला, नेटवर्क व्यवस्थापन र सुरक्षाका लागि आवश्यक पूर्वाधार विस्तार गर्ने योजना छ । स्ववियु निर्वाचन आगामी चैत ५ गते हुँदैछ । चौरसिया र यादवले पारदर्शी, अनुशासित र जिम्मेवार स्ववियुको आवश्यकता रहेको भन्दै सम्पूर्ण विद्यार्थीलाई आफ्ना सबै उम्मेदवारलाई समर्थन र मतदान गर्न आग्रह गरेका छन् ।
