ओमप्रकाश सर्राफ/
सेढवा । बिहेको लगन शुरू भएपछि सीमावर्ती भारतीय बजारमा नेपाली उपभोक्ताहरूको भीड लाग्न थालेकाे छ । विवाह भोजनका लागि खाद्यान्न, किराना सामग्री, लत्ताकपडा र भाडाकुँडा खरीद गर्न नेपाली उपभोक्ताहरू प्रायः गरेर भारतीय बजार जाने गर्छन् ।
सिमावर्ती भेलाही, सिक्टा, मैनाटार, इनर्वा, भङ्गहा, रक्साै लगायतका भारतीय बजारहरुमा यतिबेला नेपाली ग्राहकको भीड लाग्ने गरेकाे छ । भारतीय बजारमा सामग्री सस्तो पाइने गरेकोले नेपाली उपभोक्ताहरूको पहिलो रोजाइ भारतीय बजार नै हुन गरेकाे छ ।
पटेर्वा सुगौली गाउँपालिका-३ निवासी भागवत चौधरीले नेपालभन्दा भारतीय बजारमा लत्ताकपडाको मूल्य ३०-४० प्रतिशत सस्तो भएको बताए । एक-दुई थान कपडा खरीद गर्न नेपाली बजारमा जाने गरेको भएपनि बिहेका लागि ठूलो परिमाणमा कपडा खरिद गर्न भारतीय बजारमा किनमेल गर्नुपर्ने बताए ।
त्यस्तै भोजका लागि चामल, दाल, खाने तेल, मैदा, बेसन, खाद्य पदार्थ पनि खरीद गर्न भारतीय बजारको भर पर्नुपरेको बताए । सखुवा प्रसौनी गापा-१ की सङ्गतिा देवीले भारतीय बजारमा भारु २ सयमा प्रतिकिलो आल्मुनियमको भाडाकुँडा पाइने गरेको बताइन् । उनले नेपालमा सोही भाँडाको मूल्य नेपाली रुपैया चार सय प्रतिकिलो पर्ने बताइन् ।
पर्सा जिल्लाका अधिकांश उपभोक्ता बिहेको आवश्यक सामग्री खरीद गर्नका सीमावर्ती भारतीय बजारमा भर पर्ने गरेका छन् । यस क्षेत्रका जिराभवानी, ठोरी, पटेर्वा सुगौली, सखुवाप्रसौनी, जगरनाथपुर, धोबिनी, छिपहरमाई, कालिकामाई, पकहाँ मैनपुर लगायतका बिवाह भोजको ८० प्रतिशत सामान भारतीय बजारबाट नै खरिद हुने गरेका छन ।
त्यस्तै सीमावर्ती भारतीय बजार पनि नेपाली ग्राहककै कारण चल्ने गरेको त्यहाँका व्यापारीहरूले बताएका छन् ।
