सेढवा । पर्साको जगरनाथपुर गाँउपालिकाले नसर्ने राेगहरुकाे पहिचानकाे लागि एक महिने अभियान सुरु गरेकाे छ । जगरनाथपुर गाउँपालिकाकाे स्वास्थ्य शाखाकाे आयाेजनामा फागुन ५ गतेदेखि सुरु भइरहेकाे अभियान अन्तर्गत ३० बर्षभन्दा बढि उमेरका महिला र पुरुषको विभिन्न राेगहरुकाे चेकजाँच भइरहेकाे छ ।
विजबनिया स्वास्थ्य चाैकीबाट सुरु भएकाे अभियानकाे फागुन ५ गते गाउँपालिका अध्यक्ष श्रीकान्त प्रसाद यादवले सुभारम्भ गरेका थिए । त्यसपछि समुदायमा रहेका आमनागरिकहरुलाई घर दैलौमा गई स्वास्थ्यकर्मीहरुले बिभिन्न रोगको चेकजाच गर्न थालेकाे जगरनाथपुर गाउँपालिकाका स्वास्थ्य शाखा प्रमुख प्रभेन्द्र साहले जानकारी दिए ।
गाउँपालिका अन्तर्गतका ६ वटा वडाका बिभिन्न टोलमा बसोबास गर्ने व्यक्तिहरुको तौल र उचाईका आधारमा बिएमआई निकाल्ने, रक्तचाप जाच गर्ने, रक्तमा चिनीको मात्राको जाच गर्नुको साथै मृगौलाको जाच गर्न क्रेटिनाइनको जाच भइरहेको स्वास्थ्य शाखा प्रमुख साहले बताए ।
फागुन २९ गतेसम्म चल्ने याे अभियान अन्तर्गत पिसाब तथा रगतबाट चिनि जाँच, क्रेटिन जाँच, बि.पि. जाँच, पिसाबकाे प्राेटिनकाे जाँच, शरीरकाे ताैल र उचाईकाे आधारमा बिएमआई मापन निशुल्क भइरहेकाे गाउँपालिकाका प्रमुख प्रशासकिय अधिकृत सन्देश कुमार यादवले वताए । परिक्षणबाट फेला परेका मधुमेह तथा उच्च रक्तचाप रोगका औषधी स्वास्थ्य चौकीले निःशुल्क उपलब्ध गराइरहेकाे स्वास्थ्य शाखाले जनाएकाे छ ।
साथै कतिपय दिर्धकालिन रोगको पहिचान भए रोगीले खानपान, आफ्ना दैनिक जीवनमा सुधार ल्याउने तथा सम्बन्धित चिकित्सकहरुसंग सम्पर्क गरी रोगीले आफै खर्च व्यवहर्ने व्यवस्था हुने जनाइएकाे छ । तर समयमै रोगका बारेमा जानकारी प्राप्त भए समयमै उपचार गराउदा ठूलो समस्याबाट जोगिन सहज हुने स्थानीयको भनाई रहेकाे छ ।
