वीरगंज । सर्वाेच्च अदालतले वीरगंजकाे नारायणी अस्पतालकाे भवन निर्माण सम्बन्धि मुद्दाकाे फैसला गरेपछि वीरगंजबासी खुसी भएका छन् । पाँच बर्षदेखि अड्किएकाे नारायणी अस्पतालमा ५०० शैयाकाे भवन निर्माण सम्बन्धि मुद्दाले निकास पाएपछि साेमबार सांझ वीरगंजकाे घण्टाघरमा दिप प्रज्वलन गरिएकाे छ ।
सर्वाेच्च अदालतले ५ बर्षपछि निकास दिएपछि वीरगंजमा दीप प्रज्वलन कार्यक्रम गरेर खुशीयाली मनाइएकाे हाे । साेमबार साँझ नारायणी अस्पतालका चिकित्सक, स्वास्थ्यकर्मी, कर्मचारी, नागरिक समाजका अगुवा, राजनीतिक दलका नेताकार्यकर्ता, विभिन्न संघसंस्थाका प्रतिनिधि लगायतले घणटघर चाेकमा दीप प्रज्वलन गरेर खुशीयाली मनाएका हुन् ।
दिप प्रज्वलनमा सहभागि पूर्व प्रदेश सभा सदस्य राजेश्वर साह तेलीले सर्वाेच्च अदालतकाे फैसला स्वागत योग्य रहेकाे बताए । उनले अब नारायणी अस्पतालकाे भवन निर्माणकाे काम फास्ट ट्रयाकबाट सुरु गराउन नागरिक समाज निरन्तर लाग्नु पर्ने वताए ।
उनले भने,`वीरगन्जका हकमा अन्यपनि महत्वाकांक्षी परियाेजनाका मुद्दा सर्वाेच्चमा बर्षाैदेखि विचाराधीन छन् । अब ती मुद्दाकाेपनि सर्वाेच्चले छिट्टै छिनाेफानाे लगाइदिनु पर्छ ।´त्यसका लागिपनि वीरगंजबासीले यस्तै दबाब र खबरदारी अभियान सुरु गर्नुपर्नु धारणा उनले राखे ।
सर्वाेच्च अदालतले यसअघिको उच्च अदाल जनकपुर अस्थायी इजलाश वीरगंजले निर्माण कम्पनिकाे पक्षमा गरेकाे फैसला साेमबार उल्टाइ दिएपछि भवन निर्माण प्रकृयाले निकास पाएकाे हाे ।
सर्वाेच्च अदालतका न्यायाधीशद्वय हरि फुयाँल र सुनिल पाेख्रेलकाे संयुक्त इजलाशले उच्च अदालतले यसअघि निर्माण कम्पनिको पक्षमा गरेको फैसला उल्ट्याउँदै शहरी विकास तथा भवन निर्माण विभागकाे पक्षमा फैसला गरेकाे नारायणी अस्पताल विकास समितिका अध्यक्ष धिरजकुमार गुप्ताले जानकारी दिए । साेमबार सर्वाेच्च अदालतले गरेकाे फैसलाकाे पूर्णपाठ भने आउन बाँकी नै रहेकाे उनले बताए ।
सर्वाेच्चकाे फैसलाले ५ बर्षदेखि अन्याेलमा रहदै आएकाे ५०० शैयाकाे भवन निर्माण प्रकृयाले अब भने निकास पाएकाे अस्पतालका सुचना अधिकारी वरिष्ठ चिकित्सक डा. उदयनाराण सिंहले बताए । उनले भने,`भवनका लागि हामी ५ बर्षदेखिदिनरात नभनेर लागि परेका थियाैं । आज सर्वाेच्चकाे याे फैसलाले अस्पतालका सबै स्वास्थ्यकर्मी, कर्मचारी मात्रै नभई वीरगंजबासी समेत हर्षित छन् ।
अस्पतालका वरिष्ठ चिकित्सकसमेत रहेका भवन निर्माण संघर्ष समितिका संयाेजक डा. नीरज सिंहले सर्वाेच्चकाे फैसलाले अब भवन निर्माणका लागि नयाँ प्रकृया सुरु गर्न सरकारलाई बाटाे खुलेकाे बताए ।
वीरगंज महानगरपालिकाका पूर्व मेयर विजय सरावगीले लामो समयदेखि बिचारधिन अवस्थामा रहेकाे नारायणी अस्पतालकाे मुद्दामा सर्बोच्च अदालतको ऐतिहासिक फैसलाले अस्पताल निर्माणको बाटो खुलेकाे वताए । उनले मुद्दा फैसला गर्ने सर्बोच्च अदालतका न्यायाधीशहरुलाई धन्यवाद समेत दिए ।
सरकारले नारायणी अस्पताललाई २०७४ सालमै केन्द्रिय अस्पताल घोषणा गरेर ५०० शैयाकाे नयाँ पाँच तल्ले भवन निर्माणका लागि २०७५ चैत १८ गते १ अर्ब ५५ करोड ५३ लाख ८४ हजार ७५ रुपैयाँ बजेट विनियोजनपनि गरेको थियो । भवन निर्माणका लागि शहरी विकास तथा भवन निर्माण विभागले बोलपत्र (टेण्डर ) आह्वान गरेको थियो । २०७६ साल जेठ २ गते बेलपत्र खोल्दा एकमात्र बोलपत्र बंगलादेशको एनडिइ/भ्याली कन्स्ट्रक्सन प्रालि(भिसिपिएल)/ नेसनल डेभलपमेन्ट इञ्जिनियरिङ (एसएसएनसी) पुल्चोक ललितपुरलाई परेको थियो ।
तर सार्वजनिक खरिद (छैठौं संशोधन) नियमावली अनुसार २०७५ को नियम ३१ (ङ) को उपनियम (१) बमोजिम स्वदेशी बोलपत्रदाताहरुबीच मात्रै प्रतिस्पर्धा गराउनु पर्ने व्यवस्था भएकाले उक्त बोलपत्र दाता पूर्णताको परिक्षामा अनुत्तीर्ण भएको निर्णय विभागले गरेको थियो । त्यसपछि विभाग र ठेकेदार कम्पनिबीचको विवाद अदालतमा पुग्यो । उच्च अदालत जनकपुर अस्थायी इजलाश वीरगंजले २०७६ मंसिर ८ मा सुरुमा बोलपत्र दाखिला गरेको निवेदन समेतलाई समावेश गरी पुन अर्को बोलपत्र प्रकृया अगाडि बढाउन शहरी विकास तथा भवन निर्माण विभागको नाममा परमादेश जारी गरेको थियो ।
त्यसपछि शहरी विकास तथा भवन निर्माण विभागले २०७६ फागुन १ गते पुन अर्को बोलपत्र आह्वान गरेको थियो । तर दोस्रो पटकको बोलपत्र आह्वानमापनि सुरुको निर्माण कम्पनिहरुले बैंक भौचरमा नाम फरक परेको कागजात पेश गरेको भेटिएपछि उसको बोलपत्र विाभगले फेरि बदर गरिदिएको थियो । त्यसपछि ठेकेदार कम्पनी पुन उच्च अदालतमा पुगेको थियाे । उच्च अदालतले ठेकेदारकै पक्षमा फैसला गरेपछि उक्त फैसलाकाे विरुद्धमा शहरी विकास तथा भवन निर्माण विभागले सर्वाेच्च अदालतमा पुनरावेदन हालेको थियाे ।
तर सर्वाेच्च अदालतले उक्त मुद्दाकाे पटक पटक पेसी सार्दै ५ बर्षदेखि छिनाेफानाे नलगाउँदा भवन निर्माण प्रकृया अन्याेलमा परेको थियाे ।
सर्वाेच्च अदालतमा ५ बर्षदेखि अड्किएकाे भवन निर्माण सम्बन्धिकाे मुद्दाको छिनाेफानाे छिट्टै लगाउनका लागि दबाब दिन अस्पतालका डाक्टर, नर्स र कर्मचारीहरुले माघ १८ गतेदेखि आन्दोलन गर्दै आइरहेका थिए । उनिहरुकाे आन्दाेलनप्रति वीरगंजका नागरिक समाज, राजनीतिक दल, विद्यार्थी संघसंगठन लगायतले संस्थागत रुपमै ऐक्यबद्धता जनाउँदै सडक प्रदर्शनपनि गर्दै आइरहेका थिए ।
