वीरगंज । नेकपा (एकीकृत समाजवादी) का केन्द्रिय सदस्य मनाेज चाैधरीले नारायणी अस्पतालकाे भवन निर्माणकाे काम चाँडै सुरु गर्न माग गरेका छन् ।
उनले सरकारले पाँच वर्षअघि नै नारायणी अस्पताललाई केन्द्रीय अस्पतालका रूपमा स्तरोन्नति गर्ने निर्णय गर्दै पाँच सय शय्याको भवन निर्माणका लागि बजेट विनियोजन गरिसकेको भएपनि हाल सम्म भवन निर्माणकाे काम सुरु नभएका कारण अस्पतालकाे सेवा प्रवाहमा समस्या भएकाेले चाँडै नै काम सुरु गर्नु पर्ने माग गरेका हुन् ।
एकीकृत समाजवादीका वीरगंज महानगर समितिका अध्यक्ष समेत रहेका नेता चाैधरीले अस्पतालकाे भवन निर्माणकाे ठेक्का सम्बन्धि मुद्दा सर्वोच्च अदालतमा रहेकाे र २८ गते मुद्दाकाे पेशी रहेकाेले अदालतकाे फैसला पक्ष वा विपक्षमा आएपनि तुरुन्त नारायणी अस्पतालकाे निर्माण कार्य सुरु हुनु पर्ने वताए ।
स्थानीयदेखि प्रदेश र केन्द्रसम्मका जनप्रतिनिधिहरूले नारायणी अस्पतालको विषयलाई गम्भीरताका साथ लिनु पर्ने उनकाे भनाई छ । नारायणी अस्पतालको विषय समयमा नटुंगिए वीरगंजका जनताले सडकमा उत्रिएर सरकारलाई घुँडा टेकाउने उनले चेतावनी समेत दिएका हुन् ।
नारायणी अस्पतालका पूर्वाधार अभावका कारण वीरगंजसहित आसपासका जिल्लाहरू बारा, रौतहट, सर्लाही र भारतको बिहार र उत्तर प्रदेश राज्यका समेत गरी लाखौँ नागरिकले स्वास्थ्य सेवामा कठिनाइ भोग्नुपरेको भन्दै नेता चाैधरीले सरकारको ध्यानाकर्षण समेत गराएका छन् ।
