वीरगञ्ज । वीरगंज उद्योग वाणिज्य संघ (वीउवासंघ) र सिए नरेश पटेल बीच कर तथा राजस्व सम्बन्धी राय, सल्लाह र सुझाव प्रदान गर्नका लागि सम्झौता पत्र (एमओयू) मा हस्ताक्षर भएको छ । सम्पन्न सम्झाैता पत्रमा वीरगंज उद्याेग वाणिज्य संघका अध्यक्ष अनिल कुमार अग्रवाल र सिए पटेलले हस्ताक्षर गरेका छन् ।
सम्झौता हस्ताक्षर कार्यक्रममा वीउवासङ्घका अध्यक्ष अग्रवालले द्विपक्षीय सहकार्यबाट सङ्घका सदस्यहरूले कर, राजस्व तथा स्थानीय करसम्बन्धी नयाँ सूचना र परिपत्रको जानकारी प्राप्त गर्न सक्ने र राजस्व प्रशासनले प्रदान गर्ने सेवा सुविधाबाट लाभान्वित हुने विश्वास व्यक्त गरे। अध्यक्ष अग्रवालले यस क्षेत्रका उद्योगी तथा व्यवसायीहरूले भोगिरहेका कर र राजस्व सम्बन्धी समस्याहरू कर प्रशासन समक्ष राख्न यो समझदारीले सहजता ल्याउने बताए ।
सिए पटेलले करसम्बन्धी राय, सल्लाह र परामर्श उपलब्ध गराउने अवसर प्रदान गरिएकाेमा खुसी व्यक्त गरे । उनले करसम्बन्धी समस्याहरूलाई सम्बन्धित सरोकारवालासमक्ष राखी समाधानको लागि समन्वयात्मक भूमिका निर्वाह गर्ने प्रतिबद्धता जनाए ।
हस्ताक्षरित सम्झौतामा निम्न बुँदाहरू समावेश गरिएका छन्: आयकर, मूल्य अभिवृद्धि कर (भ्याट) र अन्तःशुल्क सम्बन्धी आवश्यक सल्लाह र सुझाव सङ्घका सदस्य तथा बारा/पर्साका उद्योगी व्यवसायीलाई विद्युतीय माध्यमबाट उपलब्ध गराउने ।
आन्तरिक राजस्व कार्यालय वा विभागमा बुझाउनुपर्ने कर विवरण तयार पार्न तथा पेश गर्न कानुनी प्रावधानअनुसार सल्लाह सुझाव उपलब्ध गराउने । आन्तरिक राजस्व कार्यालय वा विभागद्वारा प्रदान गरिएका कर छुटका सुविधाहरू सम्बन्धित पक्ष र व्यवसायीहरूलाई जानकारी दिन विद्युतीय माध्यमबाट सूचना प्रवाह गर्ने ।
कर कानुनमा भएका परिमार्जन, अनुपालनको म्याद तथा नियामक अपडेटहरू आवश्यकतानुसार जानकारी गराउने । उद्योगी व्यवसायीलाई सहजता यस समझदारीले उद्योगी व्यवसायीहरूलाई कर तथा राजस्वसम्बन्धी अस्पष्टता हटाउन, समस्या समाधान गर्न, र नयाँ परिपत्र तथा नीतिबारे जानकारी दिन महत्वपूर्ण भूमिका खेल्ने विश्वास व्यक्त गरिएको छ ।
सम्झौताले उद्योगी व्यवसायीहरू र कर प्रशासनबीच समन्वयलाई अझ प्रभावकारी बनाउन सहयोग पुर्याउने अपेक्षा गरिएको छ ।
कुनै पनि जिज्ञासा भएमा वाटसप नम्बर +९७७९८०२५९४७०० मा सम्पर्क गर्न सकिने छ । सेवाग्राहीले आफ्नाे जिज्ञासा टेक्स्ट, तस्बिर, भिडियो वा अडियो नोटको रूपमा साझा गर्न सक्छन् । साे चासो र जिज्ञासा २४ देखि ४८ घण्टाभित्र सम्बोधन गरिने सिए पटेलले वताए ।
