वीरगंज । लोकतान्त्रिक समाजवादी पार्टी नेपालका मधेश प्रदेश अध्यक्ष जितेन्द्र सोनललाई पार्टीले स्पष्टीकरण सोधेको छ । बाराको क्षेत्र ४ (ख) बाट प्रदेश सांसदमा निर्वाचित भएका सोनलमाथी आफुखुशी आफैलाई संसदीय दलको नेता घोषणा गरेको पार्टीले आरोप लगाएको छ ।
पार्टीको निर्देशन र मनसाय बिना मा. जयनुल राईनको अध्यक्षतामा बैठक बोलाई आफुलाई संसदीय दलको नेता घोषणा गरेको तथा सभामुख समक्ष पेश गरेकोमा यो पार्टीलाई कदापी मान्य नहुने स्पष्टिकरण पत्रमा उल्लेख गरिएको छ ।
लोसपा अध्यक्ष महन्त ठाकुरद्वारा हस्ताक्षरित स्पष्टिकरण पत्रमा ३ दिन भित्र चित बुझ्दो जवाफ माग गरिएको छ । चित बुझ्दो जवाफ नआएको खण्डमा पार्टीबाट निसकान गरिने सोनललाई चेतावनी दिइएको छ ।
लोसपा अध्यक्ष ठाकुरले आइतवार नै एक पत्र मार्फत सभामुख मधेश प्रदेश एवं सभा सचिवालय मधेश प्रदेश जनकपुरधामलाई सम्बोधन गर्दै प्रदेश संसदीय दलको नेताको हकमा पार्टीले अर्को कुनै अधिकारीक निर्णय नगरेको जनाउँदै हालका लागि लोसपा मधेश प्रदेश संसदीय दलको नेताको रुपमा अभिराम शर्मालाई नै निरन्तरता दिन अनुरोध गरेका छन् ।
सोनलले गल्ती गरेको भन्दै पार्टीलाई चित बुझ्दो जवाफ दिनु पर्ने लोसपाका एक नेताले बताए । नत्र यो हर्कतसँगै लोसपामा उनको साढेसाती शुरु हुने अध्यक्ष ठाकुर नजिक रहेका ती नेताको भनाई थियो ।
