वीरगंज । जंगली हातीको दुई वटा दारासहित ३ जनालाई पर्सा प्रहरीले पक्राउ गरेको छ । पर्साको ठोरी गाउँपालिका वडा नम्बर ४ गोरखपुर टालबाट प्रहरीले तीनै जनालाई पक्राउ गरेको हो ।
पर्साको ठोरी गाउँपालिका वडा नम्बर ४ बिजयबस्ती गुम्बालाइन बस्ने ४१ वर्षीय कुइसंग लामा, वीरगंज महानगरपालिका वडा नम्बर १४ पिप्रा बस्ने ४० वर्षीय प्रेम शर्मा र वीरगंज महानगरपालिका वडा नम्बर ३१ बस्ने ३१ वर्षीय अमिरीलाल महतोलाई पक्राउ गरिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक दिपक भारतीले जानकारी दिए ।
ठोरी गाउँपालिका वडा नम्बर ४ का चन्द्र परियारको खेतमा खाल्डो खनी अनुमानित २१/२१ किलोग्रा मतौल भएको दुई वटा हातीको दारा फेला परेको प्रवक्ता भारतीले वताए । हातीको दारा विक्रि गर्नका लागि ग्राहक खोजी भइरहेको सूचनाको आधारमा प्रहरीले अनुसन्धान तिव्र बनाएको प्रहरी नायब उपरीक्षक भारतीले बताए ।
अनुसन्धानको क्रममा नेपाली ५० रुपैयाँको नोटमा सूचना स्वरुप मिति उल्लेख भएको तस्बिर र भिडियो, २१/२१ किलोग्राम वजन भएको हातीका दारा दुई थान र मोबाईल एक थान बरामद भएको डिएसपी भारतीले बताए ।
तीनै जना विरुद्ध डिभिजन वन कार्यालयसँगको समन्वयमा थप अनुसन्धान र कारवाही भइरहेको जिल्ला प्रहरी कार्यालय पर्साले प्रेस विज्ञप्ती मार्फत जनाएकाे छ ।
