वीरगंज । पर्साको बिन्दबासिनी गाउँपालिकामा १६ जना शिक्षक पदस्थापन भएका छन् । शिक्षक सेवा आयोगले लिएको परीक्षामा पर्सा जिल्लाबाट नाम निकालेर सिफारिस भएका नवप्रवेशी शिक्षकशिक्षिकाहरुलाई सोमवार एक कार्यक्रमका बीच पदस्थापन गरिएको हो ।
बिन्दबासिनी गाउँपालिकाका अध्यक्ष प्रमोद तिवारीले १६ जना शिक्षकशिक्षिकालाई खादा र टीका लगाई पदस्थापन पत्र प्रदान गरेका हुन् । साथै उनले दत्तचित्त भएर शिक्षण पेशामा समर्पित भई पालिकाको शैक्षिक विकासमा सहयोग गर्न पनि आग्रह गरेका छन् ।
पालिकामा शैक्षिक जनशक्ति अभाव खट्किएको अवस्थामा नियुक्त भएर आएका शिक्षकशिक्षिकाले सामुदायिक विद्यालयको शैक्षिक गुणस्तर वृद्धिमा टेवा पुग्ने अध्यक्ष तिवारीको विश्वास छ ।
सो अवसरमा गाउँपालिकाका प्रमुख प्रशासकिय अधिकृत राकेश ओझा, लेखा अधिकृत मिथलेश कुशवाहा, शिक्षा शाखा प्रमुख कपिल लामिछाने लगायतको उपस्थिती रहेको श्री नेपाल राष्ट्रिय प्राथमिक विद्यालय मधवलका प्रधानाध्यापक मुकलेश राउत गद्दीले जानकारी दिए ।
