वीरगंज । जनमत पार्टीको केन्द्रीय समितिको बैठक शनिबारदेखि वीरगंजमा सुरु भएको छ । वीरगंजस्थित क्लासिक ब्यांकेटमा सुरु भएकाे बैठककाे उद्घाटन पार्टीका केन्द्रिय अध्यक्ष डा. सिके राउतले गरेका थिए ।
बैठकमा आगामी आन्दोलन, संगठन विस्तार, संगठन सुदृढीकरण, वडा अधिवेशन लगायतका विषयमा छलफल हुने जनमत पार्टीका केन्द्रीय प्रवक्ता डा. शरदसिंह यादवले बताए । शनिबार विहानदेखि सुरु भएकाे बैठक आइतबार दिउसाे सम्पन्न हुने उनले वताए ।
जनमत पार्टीले सुरु गरेको नौलो गणतन्त्रका लागि आन्दोलनको बारेमा पनि बैठकमा छलफल हुने प्रवक्ता यादवले बताए । नौलो गणतन्त्रको बारेमा सो पार्टीका अध्यक्ष डा.सिके राउतले राजनीति प्रतिवेदन प्रस्तुत गर्ने छन् र सोही प्रतिवेदनमाथि छलफल गरी निष्कर्षमा पुग्ने वताइएकाे छ ।
‘नौलो गणतन्त्र किन ?’ भन्ने शीर्षक राखेर जनमत पार्टीले पर्चा समेत बनाएको छ । सो पर्चाका बारेमा छलफल गरी भोलि वीरगंजमा वितरण गर्ने कार्यक्रम पनि राखिएको छ । साथै बैठकमा अहिलेको वर्तमान सरकार तथा गठबन्धनको बारेमा पनि समीक्षा गर्ने बताइएको छ ।
जनमत पार्टी वर्तमान गठबन्धन र सरकारमा सहभागी छैन । जनमत पार्टीले देशभर वडा समितिको अधिवेशन सम्पन्न गरिसकेको छ । त्यसको प्रतिवेदन पनि प्राप्त भइसकेको छ । बैठकले त्यस बारेमा पनि छलफल गर्ने केन्द्रीय प्रवक्ता यादवले बताए ।
