अभिनेता रणवीर कपूर र रश्मिका मन्दना अभिनीत फिल्म ‘एनिमल’ मंसिर १५ गतेदेखि प्रदर्शन हुँदैछ । केही दिनअघि फिल्मको ट्रेलर सार्वजनिक गरिएको थियो ।
ट्रेलर सार्वजनिक भएपछि फिल्मलाई लिएर दर्शक निकै उत्साहित देखिएका छन् । फिल्ममा रणवीर कपूर हिंस्रक अवतारमा प्रस्तुत भएका छन् । यस फिल्मले भारतमा मात्र नभई विश्वभर चर्चा बटुलिरहेको छ ।
भारतीय सञ्चारमाध्यमका अनुसार अमेरिकामा यो फिल्म ८८८ स्क्रिनमा रिलिज हुँदैछ । रणवीरको पछिल्लो फिल्म ‘ब्रह्मास्त्र’ ८१० स्क्रिनमा प्रदर्शन भएको थियो । यस मामिलामा ‘एनिमल’ ले शाहरूख खानको फिल्म ‘जवान’ को पनि रेकर्ड तोडेको छ ।
अमेरिकामा ‘जवान’ ८५० स्क्रिनमा प्रदर्शन भएको थियो । अमेरिकामा सर्वाधिक शोज पाउने ‘एनिमल’ पहिलो भारतीय फिल्म हो ।
साथै ‘एनिमल’ ले ‘जवान’ लाई २४ घण्टामा ट्रेलर हेरिएको सूचीमा पनि उछिनेको छ । ‘एनिमल’ को हिन्दी ट्रेलर २४ घण्टामा ७१ मिलियन पटक हेरिएको छ भने ‘जवान’ ले ५५ मिलियन भ्युज पाएको थियो । तर ‘एनिमल’ ले ‘केजिएफ २’ र ‘आदिपुरूष’ को रेकर्ड भने तोड्न सकेन ।
सन्दिप रेड्डी वांगाले निर्देशन गरेको फिल्ममा रणवीर कपूर, रश्मिका मन्दना, बबी देओल, अनिल कपूरको मुख्य भूमिका छ । फिल्ममा अनिल रणवीरको बाबुको भूमिकामा छन् भने रश्मिका उनको श्रीमतीको भूमिकामा देखिएका छन् ।
भुषण कुमार, प्रणय रेड्डी, मुरद खेतानी र कृष्ण कुमारले लगानी गरेको फिल्मको कथा निर्देशक सन्दिपले नै लेखेका हुन् । यो फिल्म हिन्दी, तमिल, तेलुगु, मलयालम र कन्नड गरी पाँच भाषामा प्रदर्शन हुँदैछ ।
