वीरगंज । आज जनता पार्टी (आजपा) का अध्यक्ष एवम् पूर्व मन्त्री प्रभु साहले सत्तारुढ गठबन्धन सरकार विघटन हुनुपर्ने बताएका छन् । मुलुकलाई सङ्कटबाट निकास दिनका लागि वर्तमान सरकार विघटन गरी अन्तरिम सरकार बनाएर अघि बढ्नु नै सही निर्णय हुने उनको भनाई छ ।
सोमबार काठमाडौँमा आयोजित पार्टी स्थायी समिति बैठकमा बोल्दै अध्यक्ष साहले बिचौलिया र दलालहरूको हिस्साको रूपमा काम गरिरहेको सरकारलाई विघटन गर्नुको विकल्प नरहेको दोहोर्याए । उनले मुलुकमा विद्यमान राजनीतिक अराजकतालाई अन्त्य गर्नका लागि राष्ट्रपतीय प्रणालीमा जानुपर्ने प्रस्ताव समेत गरे ।
साहले सरकारले मिटरब्याजीको नाममा भ्रष्टाचार र घुस खोरीलाई बढवा दिएको उल्लेख गर्दै त्यस विरुद्ध आफ्नो पार्टीले आन्दोलन गर्ने चेतावनी समेत दिए । उनले भने, ‘मिटरब्याजीको नाममा भ्रष्टाचार, घुस खोरी चरम सीमामा छ । यसलाई रोक्न सबैको ध्यान जाओस् । खास गरी सरकार, जसले मिटरब्याजीमार्फत गरिबलाई न्याय दिन्छु भनेको थियो । आज ती कुरा हावादारी जस्तो भयो । गरिबले न्याय पाएनन् । अन्ततः दलालले लाभ पाए । घुसखोर कर्मचारीले लाभ पाए । र, आज एउटा खेल तमासा सिडिओ कार्यालयहरूमा भइराखेको छ । त्यतातिर सरकारको ध्यान जाओस् । म विशेष आग्रह गर्न चाहन्छु ।’
देशमा महँगी जस्तो ठूलो समस्या हुँदा समेत सरकारले केही गर्न नसकेको उनले आरोप लगाए । ‘महँगी ठूलो समस्या भएको छ । सरकार निकम्मा देखिएको छ । मिसावट, कालोबजारी देशको प्रमुख समस्या भएको छ । र, त्यसलाई रोक्न सरकार निकम्मा जस्तो देखिन्छ । तपाईँहरूलाई थाहा छ–नेपालमा चिनीको हाहाकार छ । एक दिन, दुई दिन होइन, महिनौँदेखि यो समस्या छ । तर पनि पर्याप्त चिनी मान्छेले पाउन सकेका छैनन् । तपाईँमा ८० रुपैयाँ केजीमा पाइने चिनी काठमाडौँमा १६० रुपैयाँ पर्छ,’ उनले भने, ‘यो भन्दा पीडादायी के हुन्छ ? सरकारले यो रेट रोक्नै नसक्ने हो र । के सरकारले आपूर्ति व्यवस्था मिलाउनै नसक्ने हो र ? जिरा ५ सय किलोको आज १५ सय पर्छ । यसलाई नियन्त्रण गर्न यदि सक्दैन भने, जनतालाई सहज ढङ्गले सेवा दिन सक्दैन भने छोड्नु पर्छ । सक्छौँ भने परिणाम देखाऊ सरकार ।’
उनले सरकार बिचौलिया र दलालहरूको हिस्सा बनिसकेको बताए । ‘यसै हिसाबले सरकार चलिराख्यो भने नेपाली जनताको भविष्य छैन । यतातिर सबैको ध्यान जाओस् भन्ने चाहन्छु । हाम्रो यो बैठकले यसलाई सही निष्कर्ष दिन सक्नु पर्छ । हामीले भनेका छौँ–देशको निकासको सही निर्णय भनेकै यो सरकारको विघटन, यो व्यवस्थाको विकल्पमा अन्तरिम सरकार बनाएर अघि बढ्ने हामीले भनेका छौँ । राष्ट्रपतीय प्रणालीमा जानुपर्छ । अनि मात्रै देशमा स्थिरता प्रदान हुन्छ । अनैतिकताको राजनीतिलाई अन्त्य गर्नुपर्छ,’ उनले थपे ।
कार्यक्रममा साहले राजनीतिक दलहरूले जनमतको अपमान गरेको भन्दै आफ्नो पार्टीले जनमत फिर्ता अभियानलाई अघि बढाउने घोषणा समेत गरे ।
