वीरगंज । बाराकाे क्षेत्र नं. २ मा जनता समाजवादी पार्टी (जसपा) नेपालका अध्यक्ष उपेन्द्र यादवकाे जित निश्चित भएकाे छ । प्रतिनिधि सभा सदस्यकाे लागि बैशाख १० गते आइतबार सम्पन्न उपनिर्वाचनकाे पछिलाे मतपरिणाम अनुसार यादव जित निश्चित भएकाे हाे ।
६७ हजार ६५७ मत गणना गर्दा जसपा अध्यक्ष यादवले २७ हजार ७०५ मत पाएका छन् भने उनका निकटतम प्रतिस्पर्धी जनमत पार्टीका शिवचन्द्र कुशवाहाले २३ हजार १६७ मत पाएका हुन् । एक हजार ४ सय ५० मत गणना गर्न वाकी रहँदा यादवले कुशवाहा भन्दा ४ हजार ५ सय ३८ मतले अगाडी रहेका कारण उनकाे जित निश्चित भएकाे हाे ।
तेस्राे स्थानमा एमालेका उम्मेदवार पुरुषाेतम पाैडेलले ९ हजार ७ सय ५६ मत, चाैथाे स्थानमा राष्ट्रिय स्वतन्त्र पार्टीका रमेश खरेलले २ हजार ८ सय २४ मत, पांचाै स्थानमा आम जनता पार्टीका अरुण कुमार ज्ञवालीले २ हजार ७ सय ३३ मत पाएका हुन् ।
यस क्षेत्रमा एक लाख ५ हजार मतदाता रहेपनि ६५.६६ प्रतिशत अर्थात ६९ हजार एक सय ७ मत मात्र खसेकाे छ । तालिम केन्द्र कलैयामा मतगणना जारि रहेकाेले अबकाे केही बेरमा अन्तिम मत परिणाम पनि आउने निर्वाचन अधिकृतकाे कार्यालयले जनाएकाे छ ।
