काठमाडौं । प्रतिनिधि सभाको सभामुखमा देवराज घिमिरे निर्वाचित भएका छन् । बिहीबारको प्रतिनिधि सभा बैठकमा एमाले सांसद सुवास नेम्वाङले घिमिरेलाई निर्वाचित गरियोस् भन्ने प्रस्ताव राखेका थिए । सो प्रस्तावमाथि छलफल र निर्वाचन भएपछि घिमिरे निर्वाचित भएका हुन् ।
घिमिरेलाई निर्वाचित गरियोस् भन्ने प्रस्तावको पक्षमा १६७ मत परेको थियो । उनको विपक्षमा १०० मत परेको थियो । मत दिन्नँ भन्नेमा १ मत परेको थियो । मतदानमा उपस्थित सांसदको संख्या २६८ रहेको थियो ।
उम्मेदवारी दर्ताको पहिलो क्रममै रहेका घिमिरे निर्वाचित भएपछि अर्की उम्मेदवार ईश्वरी न्यौपानेलाई निर्वाचित गरियोस् भन्ने प्रस्तावमाथि मतदान गर्नुपरेन् ।
ज्येष्ठ सदस्यका रुपमा सभा सञ्चालन गरिरहेका पशुपति शमशेर जबराले घिमिरे सभामुखमा निर्वाचित भएको घोषणा गरेका हुन् ।
एमालेका स्थायी कमिटी सदस्य समेत रहेका घिमिरे मंसिर ४ को निर्वाचनमा झापा-२ बाट निर्वाचित भएका थिए । उम्मेदवारी दर्तापछि दिएको प्रतिक्रियामा उनले विगतका सभामुखबाट शिक्षा लिएर आफूले जिम्मेवारी निर्वाह गर्ने बताएका छन् ।
