वीरगंज । यही मंसिर ४ गते हुने संघीय तथा प्रदेशको निर्वाचनको लागि पर्सा जिल्ला लगायत देशभरि नै चुनावी चर्चा छाएको छ । दशैं, तिहार एवं छठ पर्व सकिने लगतै मुलुक निर्वाचनमय हुने देखिएको छ । निर्वाचनको मुखमा पर्सामा जताततै चुनावी चर्चा सुन्न सकिन्छ । खास गरेर पर्सा जिल्लाको वीरगंज मुलुकै लागि औद्योगिक नगरी पनि भएको कारण यहाँ चुनावी चर्चा परिचर्चा धेरै हुने गरेको छ ।
त्यसमा पनि मधेश प्रदेशको मुख्यमन्त्री नै वीरगंजबासी भएको कारण पनि यस जिल्लाको क्षेत्र नं. १ को (ख) मा चुनावी चर्चा गम्भिर विषय बनेको छ । गत २०७४ सालको निर्वाचनमा प्रदेशसभा सदस्यमा विजयी भई मुख्यमन्त्री बनेका मोहम्मद लालबाबु राउत गद्दी पुनः यही क्षेत्रबाट प्रदेशसभा सदस्यका लागि जसपा–एमाले गठबन्धनबाट उम्मेदवार बनेका छन् । तर वीरगंजबासी उनको विकल्प खोजी रहेका छन् ।
उनी मुख्यमन्त्री हुँदा पर्सा लगायत वीरगंजबासीको लागि कुनै विकास निर्माणको काम नगरेको तथा विभिन्न काण्डमा भ्रष्टाचारको आरोप लागि सकेको कारण यहाँका नागरिकहरु उनको विकल्पमा अन्य उम्मेदवारलाई खोजि रहेका छन् । मुख्यमन्त्रीलाई निर्णायक भोट पाउने वीरगंज महानगरपालिका-१६ नगवामा पनि विकास निर्माणको नाममा जनतालाई ठगेका छन् । एतिहासिक नगवा पोखरीलाई सौन्दर्यीकरणको नाममा करोडौं भ्रष्टाचार गरि एतिहासिक पोखरीलाई अलपत्र अवस्थामा छ ।
त्यसबाट पनि नगवा क्षेत्रका जनताहरु मुख्यमन्त्रीबाट रुष्ट छन् भने नगवा क्षेत्रमा सडक, नालाको अवस्थामा पनि दयनीय छ । प्रदेशसभा सदस्यमा विजयी भएका अधिकाँश उम्मेदवारहरु आफ्नो क्षेत्रमा विकास कार्यमा सन्तोषजनक कार्य गरेका छन् तर मुख्यमन्त्रीको बजेटबाट नगवा क्षेत्रमा सडक, नालाका हकमा खासै विकास हुन सकेको छैन । मुख्यमन्त्री भएपछि उनी सधैं जनकपुर नै बस्ने गरेको कारण पनि वीरगंजबासीको दुःख बुझ्न सकेका छैनन् । यसले गर्दा पनि अहिले यस क्षेत्रका जनताहरु उनको विकल्पमा अन्य उम्मेदवार खोजी रहेका छन् ।
अर्कोतर्फ मुख्यमन्त्रीको लोकप्रिय ‘बेटी पढाउ, बेटी बचाऔं’ अभियान अन्तर्गत वितरण गरिएको साइकल खरिद प्रकरणमा भएको भ्रष्टाचारको आरोप पनि उनीमाथि लागेको छ । मधेश प्रदेशको राजधानी वीरगंजलाई बनाउने आवाज उठि रहेको बखत पनि मुख्यमन्त्रीले केही नबोली चुप लागेर बसेको र जनकपुरलाई नै माैन समर्थन गरेका कारण पनि आफ्नो क्षेत्रको जनतालाई धोका दिएको उनीमाथि आरोप छ । उनी चुनाव जितेपछि जनताको सेवा भन्दा पनि कमाउ धन्धामा लागेपछि यस क्षेत्रका जनता उनको विकल्प खोजि रहेका छन् ।
पर्सा क्षेत्र नं. १ को (ख) मा प्रदेशसभा सदस्यको लागि जसपा–एमाले गठबन्धनबाट मुख्यमन्त्री गद्दी उम्मेदवार छन् भने पाँचदलीय गठबन्धनबाट रामनारायण कुर्मी उम्मेदवार छन् । यस क्षेत्रका जनताले मुख्यमन्त्रीको विकल्पमा अन्य उम्मेदवार खोजि रहेको अवस्थामा कुर्मी पनि दरिलो उम्मेदवार भने छैनन् । उनी यस क्षेत्रका मतदाता पनि छैनन् । उनको घर वीरगंज महानगरपालिका वडा नं. १४ पिपरामा छ । जुन पर्साको क्षेत्र नं. १ को (क) मा पर्छ ।
यस भन्दा अघिको निर्वाचनमा प्रदेशसभा सदस्यमै आफ्नो क्षेत्रबाट उठ्दा पराजित भएपछि उनी आफ्नो क्षेत्र परिवर्तन गरि यस पटकको निर्वाचनमा क्षेत्र नं. १ को (ख) बाट उम्मेदवार छन् । कुर्मी पिपरास्थित नृसिंह माध्यमिक विद्यालयका अध्यक्ष १० वर्ष रहि सकेका छन् । ३ कार्यकाल उनी अध्यक्ष बनेका छन् । त्यस अवधिमा विद्यालयमा कुनैपनि काम गर्न सकेका छन् । विद्यालयमा आफ्नो बुहारी, ज्वाँई लगायत घरपरिवारको सदस्यलाई भर्ना गर्नुको साथै आसेपासेहरुलाई विभिन्न पदमा नियुक्ति गरेको उनीमाथि आरोप लागेको थियो ।
इमान्दारिको ढोल पिट्दै प्रचारवाजी गर्दै हिँडेका रामनारायण कुर्मी विभिन्न भ्रष्टाचार काण्डमा मुछिएका छन् । १० वर्षसम्म विद्यालय व्यवस्थापन समितिको अध्यक्ष रहँदा सिंन्को समेत भाँच्न नसकेका कुर्मी अब प्रदेश सभा सदस्यमा विजयी भए के गर्लान् ? भन्ने खोजविनको विषय बनेको छ । उनी काँग्रेस, नेकपा एस, माओवादी, लोसपा, तथा जनमोर्चा सम्मिलित पाँचदलीय गठबन्धनबाट प्रदेशसभा सदस्यमा उम्मेदवारी दिएका छन् ।
विकल्पमा युवा उम्मेदवार सर्राफ
पर्सा क्षेत्र नंं. १ को (ख) मा मुख्यमन्त्री गद्दीको विकल्पमा युवा उम्मेदवार ओमप्रकाश सर्राफ देखिएका छन् । उनी अहिले घरदैलो अभियानलाई तिब्रता दिएका छन् । आफ्नो क्षेत्रको प्रत्येक घरघरमा गई आफूलाई भोट दिन आग्रह गरि रहेका छन् । यसबाट अन्य उम्मेदवारहरुको मनोबल पनि खस्केको छ, जसले गर्दा यस वर्षको चुनावमा क्षेत्र नं. १ को (ख) मा युवा उम्मेदवार सर्राफको विजयी सम्भावना देखिएकाे छ ।
यस क्षेत्रका जनताहरु उनलाई मन पराएका छन् । विगत लामो समयदेखि राजनीति यात्रा गर्नुका साथै समाजसेवा कार्यमा सक्रिय रहँदै आएका छन् । मधेश आन्दोलनमा पनि उनको उल्लेखनीय भूमिका रहेको थियो तर पार्टीले उनको कामको मूल्याँकन नगरेपछि उनी अहिले जनताको साथ पाउने आशमा छन् । जनताले पनि उनीलाई जिताउने प्रतिबद्धता समेत जनाउँदै आएका छन् ।
मधेशीहरुको हक अधिकारको लागि जारी मधेश आन्दोलनको क्रममा उनी प्रहरीद्वारा गिरफ्तार भई मुद्दा समेत खेपेका थिए । उनी नारायणी अस्पताल सुधार विकासको लागि वर्षौदेखि अभियान समेत चलाएका छन् । लोडसेडिङ्गमुक्तको लागि सत्याग्रह आन्दोलन समेत गरेका छन् । सिर्सिया नदीलाई प्रदूषणमुक्त बनाउन जारी आन्दोलनमा सक्रिय भूमिका समेत निर्वाह गरेका थिए । तराई पर्यटनको लागि भिजिट मधेश अभियान समेत चलाएका छन् ।
कोरोना संक्रमण महामारीमा निःशुल्क खाना, निःशुल्क एम्बुलेन्स, अस्पतालमा विरामीहरुको उपचारको लागि सहजीकरण समेत गरेर समाजसेवामा उल्लेख्नीय कार्य गरेवापत नै उनले ‘हिरो अफ द मधेश’ लगायत विभिन्न राष्ट्रिय अन्तर्राष्ट्रिय पदक प्राप्त समेत गरि सकेका छन् । यसैगरि वीरगंजलाई राजधानी बनाउन जारी आन्दोलनमा सक्रिय भूमिका समेत निर्वाह गरेका छन् ।
घरदैलोको क्रममा सर्राफले आफूभन्दा अग्रजसँग आशिर्वाद लिने कार्यलाई तिब्रता दिएका छन् । सर्राफलाई यस क्षेत्रका नागरिकले राजनीतिक दल भन्दा पनि समाजसेवाको कार्यलाई मूल्याँकन गरि रहेका छन् । उनी यस क्षेत्रमा राजनीति दलका नेता भन्दा पनि समाजसेवीको रुपमा यस क्षेत्रमा कार्य गर्दै आएका छन् ।
