वीरगंज । पर्साको बिन्दबासिनी गाउँपालिकाले अतिक्रमण गरिएको सार्वजनिक जग्गा छुट्याई खाली गराउने काम सुरु गरेको छ । गाउँपालिकाले सार्वजनिक जग्गा अतिक्रम हटाउने बिहिबारबाट सुरु गरेको गाउँपालिका अध्यक्ष प्रमोद तिवारीले बताए ।
सार्वजनिक जग्गा छुट्याउने क्रममा पहिलो दिन वडा नं-१ बिश्रामपुरमा रहेको सेनुरियामाई मन्दिरको अतिक्रमित जग्गाको नाप नक्सा गरी अतिक्रम जग्गा छुट्याइएको उनले वताए । अतिक्रमण गरिएको जग्गाको नाप नक्सा गरी छुट्याई गाउँपालिकाकाे ऐक्सावेटरले तोडफोड गरी फीलर गाडिएको गाउँपालिकाले जनाएको छ ।
यस्तो कार्य काठमाडौंमा हुँदा गाउँबासीले प्रशंसा गरेपछि पालिका प्रमुखले आफ्नो सक्रियता बढाई पर्सा जिल्लाको पहिलो पालिकाको रूपमा अतिक्रमण सार्वजनिक जग्गा छुट्याउने काम सुरु गरेका हुन् ।
गाउँपालिका अध्यक्ष तिवारीले ३५ दिन पहिला एक सूचना जारी गर्दै अतिक्रमण सार्वजनिक जग्गा आफै खाली गर्न आग्रह गरेका थिए । सार्वजनिक जग्गा खालि गराउने अभियानमा पालिकाका कर्मचारी, स्थानिय जनप्रतिनिधि, गाउँबासी, स्थानिय प्रशासन लगायतको उपस्थिति रहेको थियो ।
