वीरगंज । पर्साकाे कालिकामाई गाउँपालिकाका पूर्व अध्यक्ष स्व. नथुनी प्रसाद कुशवाहाकाे शालिक गाउँपालिकाबाट निजि जमिनमा निर्माण भइरहेकाे पाइएकाे छ । गाउँपालिकाकाे आन्तरिक स्राेतकाे रु २० लाखकाे लागतमा वडा नं. २ भेडिहारीस्थित स्व. कुशवाहा कै नाममा रहेकाे जग्गामा शालिक निर्माण भइरहेकाे हाे ।
शालिक निर्माणकाे लागि पूर्व अध्यक्ष स्व. कुशवाहाका छाेराेहरुले एक कठ्ठा जग्गा उपलब्ध गराउने वताएपनि हाल सम्म गाउँपालिकाकाे नाममा साे जग्गा नामसारी गरेका छैनन् । तर श्री सुकई साह मावि भेडिहारी नजिक मेन राेड कै छेउवा रहेकाे साे जग्गामा उपभाेक्ता समिति मार्फत शालिक निर्माण भइरहेकाे स्थानियहरुले वताएका छन् ।
आर्थिक बर्ष २०७८/०७९ काे याेजना अन्तर्गत शालिक निर्माणकाे लागि तत्कालिन प्रमुख प्रशासकिय अधिकृत जयचन्द्र साहले उपभाेक्ता समितिलाई ३ महिना अघि नै कार्यादेश दिए पनि केही दिन अघि मात्र निर्माण कार्य सुरु भएकाे हाे । शालिक स्थापना गर्ने ठाउँमा बाउन्डरी वाल निर्माण भइसकेकाे छ भने शालिक राख्न लगायतकाे काम गर्न बाकी छ ।
शालिक निर्माण भइरहेकाे जग्गा गाउँपालिकाकाे नाममा गर्न गर्न जग्गा धनी तयार रहेकाे प्रमुख प्रशासकिय अधिकृत अमित कुमार गिरीले वताए । उनले भने “हाल निर्माण कार्य राेकिएकाे छ, गाउँ सभाकाे तयारीमा गाउँपालिकाका सम्पूर्ण जनप्रतिनिधि र कर्मचारीहरु रहेका कारण जग्गा नामसारी हुन सकेकाे छैन् ।” तर अबकाे केही दिन भित्र मै गाउँपालिकाकाे नाममा जग्गा नामसारी गराउने अधिकृत गिरीले वताए ।
यस बिषयमा बुझ्न गाउँपालिका अध्यक्ष बशिष्ट गुप्तासंग फाेनमा सम्पर्क गर्दा फाेन नउठेका कारण सम्पर्क हुन सकेन ।
