वीरगंज । पर्साको बिन्दवासिनी गाउँपालिका वडा नं. ३ ईटियाहीमा एक दिने निःशुल्क आँखा चेक जाँच तथा परामर्श शिविर सम्पन्न भएको छ ।
श्री हनुमान मन्दिर विकास समिति विन्दवासिनी गापा ३ ईटियाहिको आयोजना तथा नारायणी आई केयर बिर्ता वीरगंजको प्राविधिक सहयोगमा भएको शिविरमा २०७ जनाले आँखा परिक्षण गराएकाे आयोजक संस्थाले जनाएको छ ।
ईटियाहीको श्री कामाख्यामाई बचत तथा ऋण सहकारी संस्थाको प्राङ्गणमा भएको शिविरमा जय पोलिक्लिनिक नारायणी आई केयर वीरगंजका नेत्र रोग विशेषज्ञ एवं नारायणी अस्पतालका आँखा विभागका प्रमुख डा. बि.डि चौरसिया, दृष्टि विशेषज्ञ प्रभात चौरसिया, राजेश यादव लगायतको टिमले आँखा परिक्षण गरेका थिए ।
आँखा परिक्षणको क्रममा आँखाका रोगीहरुलाई निःशुल्क रुपमा औषधी समेत वितरण गरिएको थियो । आँखाको नजदिकी तथा दुरीका समस्या भएका १०० जना बिरामीहरुलाई निःशुल्क रुपमा चश्मा समेत वितरण गरिएको कार्यक्रमका व्यवस्थापक मुकेश चौरसियाले जानकारी दिए ।
शिविरमा संचारकर्मी अजय कुमार चौरसिया, दिपक चौरसिया, रामेश्वर चौरसिया लगायत स्थानिय समाजसेवी, बुद्धिजिवि लगायतको सहभागीता रहेको थियो ।
