वीरगञ्ज । स्वः बिन्दु देवी पाण्डे पुरस्कारबाट रेडियो वीरगंजकी समाचार वाचीका अनिता कुँवर सम्मानित भएकी छन् ।
कार्यक्रमका प्रमुख अतिथी प्रदेश २ का ऊर्जा, सिँचाइ तथा खानेपानी मन्त्री ओमप्रकाश शर्माले रु १५ हजार राशिको सो पुरस्कार कुँवरलाई प्रदान गरेका थिए ।
पुरस्कार वितरण कार्यक्रमलाई सम्बाेधन गर्दै मन्त्री शर्माले महिला पत्रकारको हितको लागि कुनै कसर बाँकी नराख्ने गरी लागि पर्ने बताए ।
उनले पत्रकारहरूको जोखिमपूर्ण कामलाई देखेरै डेढ दशकअघि निजी खर्चमा दुर्घटना बीमा गराए पनि सोलाई निरन्तरता दिन नसक्दा दुःख लागेको बताए । उनले पत्रकारको लागि सदैव राम्रो गरूँ भन्ने सोच राखेर काम गर्दा केही पत्रकारको छुद्रताका कारण आफ्नो सो प्रयासमा बाधा पुग्ने गरेको बताए ।
उनले पत्रकारको हितको पक्षमा प्रदेश सरकार रहेको र प्रदेश भरिका एफएम एवं पत्रपत्रिकाको कार्यालयलाई बिद्युत् महसुल मुक्त गराउने योजना ल्याउने पनि बताए ।
बिन्दुदेवी प्रतिष्ठानका अध्यक्ष तुलसी भण्डारी अध्यक्षतामा भएकाे कार्यक्रममा नेपाल पत्रकार महासंघका सचिव दीपेन्द्र चौहान, केन्द्रिय सदस्य केसी लामिछाने, प्रदेश नं २ का सचिव श्याम बन्जारा, बीरगंज उद्योग वाणिज्य संघका वरिष्ठ उपाध्यक्ष अनिल अग्रवाल, भोजपुरी प्रतिष्ठानका अध्यक्ष उमाशङ्कर द्धिबेदी लगायतले आ—आफ्नो धारणा राखेका थिए ।
वीरगंज लिंक राेडस्थित हाेटल कुमु प्यालेसमा भएकाे कार्यक्रमको सञ्चालन माधुरी महतोले गरेकी थिइन ।
