वीरगंज । वीरगंजमा शुक्रबार थप ३ जना कोरोना संक्रमितको मृत्यु भएको छ । वीरगंजस्थित नेशनल मेडिकल कलेजकाे काेराेना अस्पतालमा उपचाररत एक जना र वीरगंज हेल्थ केयरमा उपचाररत दुई जना काेराेना संक्रमितकाे मृत्यु भएकाे हाे ।
नेशनल मेडिकल कलेजमा उपचाररत वीरगंज महानगरपालिकाकाे वडा नं. ५ निवासी ७९ बर्षिय काेराेना संक्रमित महिलाकाे मृत्यु भएकाे जिल्ला प्रशासन कार्यालय पर्साले जनाएकाे छ ।
बैशाख १९ गते काेराेना संक्रमित भएकी महिला बैशाख २० गते नेशनल मेडिकल कलेजकाे काेराेना अस्पतालमा भर्ना भएकी थिइन । त्यसपछि अस्पतालमा उपचाररत रहेकी महिलाकाे शुक्रबार विहान ११ बजे मृत्यु भएकाे जिल्ला प्रशासन कार्यालय पर्साका प्रशासकिय अधिकृत विनय श्रीवास्तवले जानकारी दिए ।
त्यसैगरी, वीरगंज हेल्थ केयरमा उपचाररत पर्साकाे कालिकामाई गाउँपालिका वडा नं. २ भेडिहारी निवासी ५५ बर्षिय काेराेना संक्रमित पुरुषकाे मृत्यु भएकाे उनले जानकारी गराए ।
बैशाख २२ गते बुधबार अस्पताल भर्ना भएका पुरुषमा बैशाख २३ गते बिहिबार एन्टिजाेन पाेजिटिभ देखिएकाे थियाे । उनकाे शुक्रबार विहान ८ बजे मृत्यु भएकाे अधिकृत श्रीवस्तवले वताए ।
त्यसैगरी, वीरगंज हेल्थ केयर मै उपचाररत वीरगंज महानगरपालिकाकाे वडा नं. ११ निवासी ५४ बर्षिय पुरुषकाे मृत्यु भएकाे छ ।
स्वास्थ्यमा समस्या देखिए पछि बिहिबार अस्पताल भर्ना भएका पुरुषमा साेही दिन एन्टिजाेन पाेजिटिभ देखिएकाे थियाे । त्यसपछि वीरगंज हेल्थ केयरकाे काेराेना अस्पतालमा उपचाररत रहेका पुरुषकाे शुक्रबार विहान मृत्यु भएकाे अधिकृत श्रीवास्तवले जानकारी गराए ।
त्यसैगरी, बिहिबार सांझ पनि वीरगंजमा उपचारत दुई जना काेराेना संक्रमितकाे मृत्यु भएकाे थियाे ।
वीरगंजस्थित नेशनल मेडिकल कलेजमा उपचारत वीरगंज महानगरपालिकाकाे बगही निवासी ६१ बर्षिय पुरुषकाे र वीरगंज हेल्थ केयरमा उपचाररत वीरगंज महानगरपालिकाकाे वडा नं. ११ निवासी ५४ बर्षिय काेराेना संक्रमित पुरुषकाे मृत्यु भएकाे थियाे ।
