जिराभवानी । भारतमा दोश्रो चरणको कोरोनाको संक्रमणमा वृद्धि हुने क्रम नरोकिएको हुँदा नेपाल-भारतको पर्सा जिल्लासँग जोडिएका सबै ग्रामीण सिमानाकाहरु २२ गतेदेखि शील गरिएको छ ।
पर्साका प्रमुख जिल्ला अधिकारी पिताम्बर घिमिरेका अनुसार कोरोना भाइरसको संक्रमण तीव्र गतिमा फैलिँदै गएको हुँदा रोकथाम तथा नियन्त्रणका लागि पर्साका सबै सीमानाका शील गरिएको हाे ।
प्रजिअ घिमिरेले पर्सासँग जोडिएका बिरगंज, छपकैया, इनर्वा, भिस्वा, बुडगाई, मिर्जापुर, जानकिटोला, दसावता, पाण्डेपुर पिडाडी, महादेवपट्टि, सुबर्णपुर, बिजयबस्ती, ठोरीसहितका सबै नाका शील गरेर आवतजावत पूर्ण रुपमा रोक लगाइएको जनाए ।
नेपाल सरकारको मन्त्रिपरिषद्को बैठकले गत आइतबार गरेको निणर्यमा पर्सा जिल्लाका कुनै पनि नाका नखुलेको उल्लेख रहेको छ । पर्सा जिल्लाको कुनै नाका नपरेकोले जिल्लाका नाकाबाट भारततर्फ आवतजावत गर्न निषेध गरेको प्रमुख जिल्ला अधिकारी घिमिरेले गत २२ गतेको जारी गरेको सुचनामा उल्लेख गरिएको छ ।
सीमा नाका शील गरेसँगै सिमाना क्षेत्रमा भारी संख्यामा नेपाल प्रहरी तथा सशस्त्र प्रहरी परिचालन गरेर निगरानी बढाइएको छ ।
खुल्ला सिमाना भएको कारण कुनै पनि व्यक्ति नेपाल प्रवेश गर्नबाट रोक लगाउनको लागि उल्लेख्य संख्यामा सुरक्षाकर्मी परिचालन गरेर गस्ती बढाइएको हो ।
