वीरगन्ज । वीरगन्ज महानगर पालिकाको वडा नं. १४ पिपरामा शनिबार रक्तदान कार्यक्रम सम्पन्न भएको छ । युवा समाज पिपराको आयोजनामा भएको कार्यक्रममा २ महिलासहित ७१ जनाले रक्तदान गरेका थिए ।
रक्तदान कार्यक्रमको उद्घाटनका वीरगंज महानगर पालिकाका मेयर विजय कुमार सरावगीले गरेका थिए । कार्यक्रमको उद्घाटन गर्दै मेयर सरावगीले रगतमा कुनै जात, धर्मको भिन्नता नरहेन भन्दै सामाजिक भावनालाई जागृत गर्नुपर्ने धारणा राखे । महानगर प्रमुख सरावगीले मानव जीवन रक्षाका लागि अति आवश्यक रगतको अभाव हुन नदिनका लागि महानगरपालिकाले पनि रक्तसञ्चार केन्द्रको स्थापनाका लागि सोच बनाईरहेको बताए ।
युवा समाज पिपराका अध्यक्ष अनिल पटेलको अध्यक्षतामा भएको कार्यक्रममा नेकपा वीरगन्ज महानगर अध्यक्ष रहबर अन्सारी, वडाध्यक्ष भरत कुर्मी, नेपाल पत्रकार महासंघ प्रदेश नम्बर २ का उपाध्यक्ष केसी लामिछाने, नयाँवस्ती टोल सुधार समितिका अध्यक्ष हरि गौतम, प्रेस संगठन नेपाल पर्साका संयोजक निरज पिठाकोटे लगायतको उपस्थिति रहेको थियो ।
रक्तसंचार केन्द्र वीरगंजको प्राविधिक सहयोगमा रक्तदान कार्यक्रम भएको थियो ।
