वीरगंज । पर्साकाे जगरनाथपुर गाउँपालिका वडा नं. १ पिपडाँडीस्थित रहेकाे ओरिया खाेलाबाट अवैध रुपले बालुवा भारततर्फ लैजाने टयाक्टरलाई नियन्त्रणमा लिँदा शुक्रबार दुई सशस्त्र प्रहरी घाइते भएका छन् ।
नेपाली भुमिमा पर्ने खोलाबाट अवैध तरिकाले बालुवा उत्खनन गरी लगिरहेकाे टयाक्टर सशस्त्र प्रहरिले नियन्त्रणमा लिँदा भारतियहरुकाे आक्रमणले सशस्त्र प्रहरी जवानद्वय आयुष राय यादव र महेश प्रसाद यादव घाइते भएका हुन् । घाइते मध्येकाे आयुषकाे वीरगंजस्थित नारायणी अस्पतालमा उपचार भइरहेकाे छ । अर्का घाइते प्रहरी जवान महेशलाई नारायणी अस्पतालमा मै उपचार गरिएपछि शुक्रबार सांझ घर फर्केका थिए ।
प्रहरी जवान आयुसको कानमा बेल्चाको प्रहारबाट गम्भीर रुपले चोट लागेको छ । उनको कानमा १८ वटा टाँका लगाइएको उपचारमा सलंगन नारायणी अस्पतालका चिकित्सकले जनाएका छन् ।
अर्का घाइते प्रहरी जवान महेशकाे खुट्टा र हातमा चोट लागेको छ । उनको देब्रे हात भाँचिएको छ ।
बोर्डर आउट पोष्ट पिडारी गुठीका सशस्त्र प्रहरी निरिक्षक बसन्त जिसी र बोर्डर आउट पोष्ट जिराभवानीका शसस्त्र प्रहरी निरिक्षक केदार राइको टोलीले अवैध रुपमा बालुवा उत्खनन गर्ने टयाक्टरलाई नियन्त्रणमा लिन ओरिया खाेला पुगेकाे थियाे । स्थानियका अनुसार सशस्त्र प्रहरीले ३ वटा बालुवा लाेड गरेकाे भारतिय टयाक्टर नियन्त्रणमा समेत लिएकाे थियाे ।
तर नियन्त्रणमा लिइएका ट्याक्टर लिएर आउने क्रममा खोलामै ट्याक्टर भाँसिएपछि सशस्त्र प्रहरीले निकाल्ने प्रयास गरिरहेको थियो । त्यही बेला (बिहान ५ बजे )खोला छेउका भारतको भंगाहा, इनर्वा र बिसनपूर्वा गाउँबाट बेल्चा, लठठी र भाला बोकेर आएका भारतीय तस्कर र गाउँलेको हुलले सशस्त्र प्रहरीको टोलीमाथि आक्रमण गरेको थियाे ।
आक्रमणमा परि हात भाँच्चिएर घाइते भएका सशस्त्र प्रहरी जवान महेशले भने,’ बेल्चा र लठ्ठी बोकेर आएको ५०/६० जनाको हुलले अन्धाधुन्द हाम्रो टोलीमाथि आक्रमण गर्न थालि हाल्यो, जसोतसो गरेर भागेर ज्यान जोगायौं ।
स्थानीयका अनुसार बिहार पश्चिमी चम्पारण गदियानी भंगाहाका कारोबारीले बिहानदेखि साँझसम्म दैनिक एक सयदेखि एक सय ५० ट्याक्टर बालुवा उत्खनन् गरी लाने गरेका छन् । दुई देशको सीमा छुट्याउने पिलर नम्बर ४२४/१९ बाट झन्डै ७ सय मिटरभित्र नेपाली भूमिमा प्रवेश गरी निर्वाध रुपले बालुवा ढुवानी गर्दै आएका छन् । भारतीयले गरेको आक्रमणको विषयमा समकक्षीसँग समन्वय गरिरहेको सशस्त्रका एसपी राजेन्द्र खड्काले बताए ।
साेही टयाक्टरलाई लिएर आउने क्रममा सशस्त्र प्रहरी र भारतियहरु बिच झडप हुदा दुई सशस्त्र प्रहरी जवान घाइते भएका हुन् । खाेला नजिकै रहेकाे भारतिय गाउँ इनर्वा र भंगाहाबाट आएकाे ४०/५० जनाकाे समुहले आक्रमण गर्दा सशस्त्र प्रहरी घाइत । साेही झडपमा परेर सशस्त्र प्रहरी जवान २ जना घाइते भएकाे पर्साका सशस्त्र प्रहरी उपरिक्षक राजेन्द्र खड्काले वताए । ‘
खोलामा पसेर जथाभावी बालुवा उत्खनन गर्दा वातावरणसमेत प्रभावित भएको स्थानीयवासीहरुको गुनासाे छ । विगत २० वर्षदेखि उक्त खोलाको स्वामित्वका बारेमा दुई देशबीच विवाद रहेको र भारतीयले खोलाबाट बालुवा निकाल्नेक्रम नरोकिएको जगरनाथपुर गाउँपालिकाका अध्यक्ष जालिम मियाँ मन्सुरीले बताए ।
