वीरगंज । राष्ट्रिय प्रजातन्त्र पार्टी पर्साले पनि आईतबार वीरगंजमा बिरोध जुलुस निकालेको छ ।
महंगी, भ्रष्टारचार, धर्म परिवर्तन एंवम कोभिन–१९ महामारी नियन्त्रण गर्न नसक्ने सत्ताको भागबन्डामा लिप्त असफल सरकार भन्दै राप्रपाले सरकार बिरुद्ध बिरोध जुलुस निकालेको हो ।
वीरगंजको लाठगल्लीबाट निस्केको बिरोध जुलुस घठिअर्वा, माईस्थान, आदर्शनगर हुँदै नगर परिक्रमा गरेपछि पुनः माईस्थानमा पुगी कोण सभामा परिणत भएको थियो ।
बिरोध जुलुसमा बन्द करखाना खुल्ला गर, खुल्ला सिमाना नियमन गर, राष्ट्रवाद जिन्दावाद, राप्रपा जिन्दावाद, हिन्दु राष्ट्र कायम गर, महामारी अवधीको व्याज मिन्हा गर लगायतका चर्काे नारा लगाईएको थियो ।
कोणसभालाई सम्बोधन गर्दै राप्रका राष्ट्रिय अध्यक्ष कमल थापाले धर्म निर्पेक्षताको आडमा लोभ लालच देखाई सनातन धर्मलाई समाप्त पार्ने षडयन्त्र भईरहेको आरोप लगाएका छन् ।
उनले भने, ‘‘२००७ सालमा प्रजातन्त्र आएको बेला नेपालमा करिब दुई दर्जन मात्रै क्रिश्चियन थिए तर २०६२/६३ को परिवर्तन पछि धर्म निरपेक्षताको आडमा धर्म परिवर्तन गराएर अहिले झण्डै ४० लाख क्रिश्चियन बनाईएको छ ।’’
कोणसभा सम्पन्न भएपछि सो जुलुस जिल्ला प्रशासन कार्यालयमा पुगी पर्साका प्रमुख जिल्ला अधिकारी आसमान तामाङ्ग मार्फत प्रधानमन्त्रीलाई ज्ञापन पत्र बुझाएका थिए ।
