वीरगंज । जिल्ला स्वास्थ्य कार्यालय पर्साको जिल्ला स्तरिय वार्षिक समिक्षा गोष्ठि आज सम्पन्न भएको छ । स्वास्थ्य कार्यालय पर्साको सभाहलमा आईतवार देखि सञ्चालित दुई दिने समिक्षा गोष्ठि सोमवार सम्पन्न भएको छ ।
कार्यक्रमका प्रमुख अतिथि स्वास्थ्य निर्देशनालय प्रदेश नं. २ का स्वास्थ्य प्रशासक मुक्तिनारायण साहले गत वर्षमा भएका विभिन्न गतिविधि सन्तोषजनक रहेको र आउने दिनमा पनि कोरोना माहामारीलाई ध्यानमा राख्दै सुरक्षा सतर्कता अपनाउदै आ–आफ्नो कार्य जिम्मेवारीका साथ पुरा गर्न सुझाव दिनु भएको थियो ।
कार्यक्रममा स्वास्थ्य कार्यालयका नवल किशोर साहले आ.व. २०७६÷०७७ को वार्षिक कार्यपत्र प्रस्तुत गर्दै खास गरी खोप, परिवार नियोजन, पोषण, क्षयरोग, कुष्टरोग लगायतमा विशेष जोड दिईएको बताए । सो अवसरमा जनस्वास्थ्य निरिक्षक जयमोद ठाकुरले कोरोना महामारीको बीच पर्सा जिल्लामा भए गरेका गतिविधिको बारेमा कार्यपत्र प्रस्तुत गरेका थिए ।
पर्सा जिल्लामा रहेका १४ वटै पालिकाका स्वास्थ्य प्रमुखहरुले आ–आफ्नो कार्यपत्रहरु प्रस्तुत गर्नु भएको थियो ।
स्वास्थ्य कार्यालय पर्साका बरिष्ठ जनस्वास्थ्य अधिकृत कामेश्वर प्रसाद चौरसियाको अध्यक्षतामा भएको कार्यक्रममा सेभ द चिल्ड्रेनका राजेश साह लगायत विभिन्न एनजिओ, आईएनजिओका ४५ जनाको सहभागीता रहेको नवल किशोर साहले जानकारी दिनु भयो ।
