वीरगंज । काेराेना महामारीकाे समयमा कालाेबजारी बढेकाे उपभोक्ताहरुको गुनासोलाई मध्य नजर गर्दै शुक्रबार पुन: वीरगंजमा बजार अनुगमन गरिएकाे छ ।
वाणिज्य आपूर्ति तथा उपभोक्ता संरक्षण कार्यालय, जिल्ला प्रशासन कार्यालय र जिल्ला प्रहरी कार्यालय, पर्साको संयुक्त अनुगमन टोलीद्वारा वीरगंज महानगरपालिका स्थित माईस्थान २ नंम्बर रोड, लिंक रोड र नेशनल मेडिकल कलेज चौकमा रहेका विभिन्न कस्मेटिक, खाद्यन्न तथा किराना पसलहरुलाई अनुगमन गरेकाे छ ।
अनुगमन टाेलीले मूल्य सूची नराखेको तथा खरिद र विल उपलब्ध गराउन नसके तथा म्याद गुज्रेका समानहरु संचित गरी राखेको ४ वटा पलसलाई ७० हजार जरिवानसमेत गरेकाे जिल्ला प्रशासन कार्यालय पर्साले जनाएकाे छ ।
प्रशासन कार्यालयले दिएकाे जानकारी अनुसार वीरगंजकाे माईस्थान २ नं. रोडस्थित रहेकाे शान्ति जरेनरल स्टोर्सलाई रु ५० हजार, लिंक रोडस्थित रहेकाे खेमीसती जेनरल सप्लायर्स एण्ड ट्रेडर्सलाई रु. १० हजार, नेशनल मेडिकल कलेज चौकस्थित रहेकाे श्याम कोल्ड स्टोरलाई रु. ५ हजार र तारा कस्मेटिक जेनरल स्टोरलाई रु. ५ हजार जरिवाना गरिएकाे छ ।
पसलहरुलाई उपभोक्ता संरक्षण ऐन, २०७५ को दफा ३८ बमोजिम कसुर गरिएकोले सोही ऐनको दफा ३९ बमोजिमको जरिवाना गरिएको प्रशासन कार्यालयले जनाएकाे छ । अनुगमन टाेलीले खाद्य बस्तुहरुको कालोबाजारी तथा मूल्य बृद्धि नगरी विक्रि वितरण गर्ने भनी निर्देशनसमेत पसलहरुलाई दिएकाे छ ।
कोरोना महामारीको विषम परिस्थितिमा कहि कतै कुनै वस्तुहरुको कालोबाजारी तथा मूल्य बृद्धी गरी विक्री वितरण गरेको देख्नु भएमा आवश्यक प्रमाणसहित जिल्ला प्रशासन कार्यालयकाे ईमेल daoparsa1@gmail.com उजुरी गर्नसमेत अनुराेध गरिएकाे छ ।
