वीरगंज । वीरगंजस्थित नारायणी अस्पताल अगाडी आइतबार बिहान प्रदर्शन तथा तोडफोड भएको छ।
वीरगंजका अस्पतालले भर्ना नलिएपछि शनिबार राति अकालमै ज्यान गुमाएकी छपकैया २ निवासी २० वर्षीय बिष्णु लामाका परिवारजन तथा टोलीवासीले आज बिहान नारायणी अस्पताल अगाडी प्रदर्शन गर्नुकाे साथै अस्पताल भित्रका गाडी तथा गमलाहरु तोडफोड गरेका हुन्।
नारायणी अस्पतालको अर्को भवनमा मेडिकल एशोसिएसनको बैठक बसिरहेको बेला प्रदर्शनकारीहरुले पार्किङमा राखेको गाडीहरुमा ढुङ्गा प्रहार गरेका थिए । ढुङ्गा प्रहारबाट नारायणी अस्पतालका डा. उदय नारायण सिंहको ना १२ च ५९६६ नम्बरको गाडीको सिसा फुटेको छ।
प्रहरीले लाठिचार्ज गरेपछि अहिले स्थिति सामान्य भएकाे छ।
नारायणी अस्पतालमा जेनरल सेवा बन्द भएकाले निजी अस्पताललेसमेत भर्ना गर्न नमानेकाे कारणले अकालमै बिरामीले ज्यान गुमाउनु परेको परिवाजनले दावी गरेका छन्।
दिनुहुँ आम नागरिकले ज्यान गुमाउनु परेको घटना सार्वजनिक हुँदापनि अस्पताल प्रशासन मौन बस्ने गरेकाले यस्तो घटना फेरि नहोस् भनेर पुनः नारायणीलाई जेनरल अस्पतालको रुपमा सेवा सुचारु गर्न मृतकका परिवारले माग गरेका छन्।
शुक्रबार राती वीरगंजका अस्पताहरुमा घुमाउदै घुमाउदै कसैले पनि बिरामीलाई भर्ना गरी उपचार गर्न नमानेपछि बिरामीकाे मृत्यु भएपछि स्थानियहरु आक्राेसित भएका छन् । वीरगंजमा उपचार नपाएर ३ दिनमामात्र ५ जनाकाे मृत्यु भएकाे छ ।
