वीरगंज । पर्साकाे पोखरीया नगरपालिकाद्वारा आज रोग प्रतिरोधात्मक क्षमता वृद्धि गर्ने आयुर्वेद औषधि वितरण गरिएको छ ।
नगरपालिकाकाे आयुर्वेद शाखाद्वारा वीरगञ्जस्थित कोरोना आइसाेलेसन हस्पिटलमा रहेका पोखरीयाका कोरोना पोजिटिभ ५ स्वास्थ्यकर्मी र ५ सर्वसाधारण गरी १० जनालाई रोग प्रतिरोधात्मक क्षमता वृद्धि गर्ने आयुर्वेद औषधि वितरण गरिएको हाे ।
नेपाल सरकार आयुर्वेद तथा वैकल्पिक चिकित्सा विभाग, टेकुले जारी गरेको निर्देशिका अनुसार वितरण गरिएका आयुर्वेद औषधिले शरीरको रोग प्रतिरोधात्मक क्षमता वृद्धि गर्ने आयुर्वेद संयोजक डा रवीन्द्र कुमार यादवले जानकारी दिए ।
उनका अनुसार संक्रमितहरुलाई च्यवनप्राश, इम्युन केयर, अश्वगन्धा, आमलकी औषधि वितरण गरिएको हो । अहिलेको कोरोना महामारीको युद्धमा सबैले आ आफ्नो क्षेत्रबाट सचेत र सुरक्षित भई लाग्ने र प्राचीन आयुर्वेद तथा योगलाई नियमित व्यवहारमा ल्यानुपर्ने संयाेजक डा. यादवले सुझाव दिए ।
याे रोग मानवको व्यवहार, जीवनशैली, रहनसहनसंग जोडिएको प्रस्ट पार्दै योग, प्राकृतिक चिकित्सा पद्धतिलाई व्यवहारमा उतारे सजिलै कोरोनालाई जित्न सकिने उनले वताए ।
