वीरगंज । विश्वभर महामारीको रुपमा फैलिएको कोरोना भाईरस संक्रमण नियन्त्रण र रोकथामका लागि नेपाल र भारतमा गरिएको ‘लकडाउन’ ले पर्सामा एक संचारकर्मी सहित दुईजनाको विवाह रोकिएको छ ।
मंगलबारदेखि नेपालमा र बुधबारदेखि भारतमा गरिएको ‘लकडाउन’ ले बीरगन्जका संचारकर्मी जाकिर हुसेन र बहुदरामाई नगरपालिका वडा नम्बर ५ भौराटारकी एक युवतीको विवाह स्थगित भएको हो । दुबै जनाकाे विवाहकाे कार्ड समेत वितरण भइसकेकाे थियाे ।
न्युज २४ टिभीमा पर्साबाट क्यामरा पर्सनको रुपमा कार्यरत वीरगन्ज १० घडिअर्वाका जाकिरको विवाह यहि चैत १५ गते र १७ गते रिसेप्सन पार्टी गर्ने तय भएको थियो । देश नै लक डाउन भएपछि आफ्नो विवाह रोकिएको सन्देश हिजो मंगलबार जाकिरले घर मै बसेर साथीभाइ र इस्टमित्रलाई म्यासेन्जर मार्फत जानकारी गराएका छन् ।
उनले म्यासेन्जरमा लेखेका छन्, “कोराना भाईरसले मेरो विहे र पार्टी रोकिएको छ । यसबारे थप जानकारी पुनः मिति तय भएपछि जानकारी गराउछु । धन्यवाद !” कोरोना भाइरस नियन्त्रण गर्न सरकारले देश नै लक डाउन गरेकोले दुई महिना अघि तय गरिएको पत्रकार जाकिरको विवाह अहिलेका लागि स्थगित गरिएको हो । चैत १५ गते पर्साको चौकिया बैरिया ९ निवासी कलामुन नेशा खातुन संग जाकिरको विवाह हुने तय भएको थियो ।
त्यस्तै बहुदरामाई नगरपालिका वडा नम्बर ५ का शंकर प्रसाद कुश्वाहाकी छोरीको पनि यहि चैत १६ गते भारतको विहार राज्यको पूर्वी चम्पारण जिल्लाको चेगौना ग्रामका युवकसँग विवाह तय भएको थियो । विवाहको सबै तयारी भएपनि दुवै देशमा भएको ‘लकडाउन’ ले विवाह रोकिएको दुलहीका बुबा शंकर प्रसाद कुश्वाहाले बताए ।
यस्तै चैत २० गते तय भएकाे बाराकाे प्रसाैनीगाउँपालिका निवासी एक युवककाे विवाह पनि अन्याेलमा परेका छ । भारत बिहारकाे साठीकी केटी संग हुन लागेकाे मुस्लीम समुदायका युवककाे विवाह अन्याेलमा परेकाे वताइएकाे छ । काेराेना भाइरस संक्रमण राेकथामकाे लागि दुबै देशमा लक डाउन भएका कारण अन्याेलमा परेकाे हाे ।