वीरगंज । सत्तारुढ दल नेकपाका निकट अनेरास्ववियू पर्साले भारतको नयाँ नक्सामा नेपाली भूमि कब्जा गरेको भन्दै आइतबार भारतीय महावाणिज्य दूतावास, वीरगंज घेराउ गरेकाे छ । भूमि रक्षामा सम्पूर्ण नेपालीहरू एकजुट होऔँ, लिपुलेक, कालापानी, लिम्पियाधुरा हाम्रो हो, सीमा अतिक्रमण बन्द गर लगायत नारासहित भारत विरुद्ध चर्को नाराबाजी गर्दै अनेरास्ववियुले दुतावास घेराउ गरेकाे हाे ।
वीरगंजकाे घण्टाघर चौकबाट नाराबाजी सहित निकालिएको विरोध जुलुस दूतावास मूल गेट अगाडी पुगी प्रदर्शन समेत गरेकाे थियाे । विरोध कार्यक्रममा अनेरास्ववियूका नेता उमेश गुप्ता, मित्रदेव यादव, अखिलेश साह, रेयाज अंसारी, हेमन्त तमाङ्ग लगायतको सहभागिता रहेको थियो ।
त्यसैगरी देश बचाउ सङ्घर्ष समिति वीरगंजले भारतका प्रधानमन्त्री नरेन्द्र मोदीको तस्बिर जलाएको छ । भारतले नेपाली भूमि कब्जा गरेको आरोप लगाउँदै घण्टाघर चौकबाट भारत विरुद्ध चर्को नाराबाजी गर्दै दूतावास अगाडी प्रदर्शन सहित भारतीय प्रधानमन्त्रीको तस्बिर जलाएका हुन् । संघर्ष समितिका संयोजक महमुद आलमको नेतृत्वमा रहेका मुन्ना मियाँ समानी, समिर अहमद, मंजर मियाँ अंसारी, फैयाज आलम लगायतका युवाहरूले भारतीय प्रधानमन्त्री मोदीको तस्बिर जलाएका हुन् ।
प्रधानमन्त्री मोदीको तस्बिरमा आगो लगाई जलाएपछि प्रहरीले आगो निभाउने प्रयास गर्दा प्रहरी र प्रदर्शनकारी विच घम्साघम्सी समेत भएको थियो ।
