एजेन्सी । तेलुगूको ब्लकबस्टर फिल्म ‘अर्जुन रेड्डी’ बाट ‘स्टार’ बनेका अभिनेता विजय देवरकोन्डाको नयाँ फिल्मको फर्स्टलुक पोस्टर सार्वजनिक भएको छ । ‘वल्ड फेमस लभर’ नामक फिल्मको फर्स्टलुकमा विजय निकै इन्टेन्स अवतारमा देखिएका छन् । उनलाई हातमा चुरोट र मुखबाट धुँवा फ्याक्दै गरेको देख्न सकिन्छ । उनको अनुहारभरी चोट छ ।
फिल्मको नामबाट अनुमान गर्न गाह्रो पर्दैन कि यो एक लभस्टोरी कथामा बेस्ड हुनेछ । फर्स्टलुकमा देखिएको विजयको लुक्सले दर्शकमा फिल्मप्रति कौतुहलता र उत्सुकता बढाउने निश्चित छ । अहिले यो फिल्मको फर्स्टलुकले सामाजिक सञ्जालमा निकै चर्चा बटुलिरहेको छ । रिलिज अगावै फिल्मलाई ‘स्योर सट हिट’ मानिन थालिएको छ ।
विजय देवरकोन्डाको यो लुक्स उनको पछिल्लो फिल्म ‘अर्जुन रेड्डी’ भन्दा खासै अलग छैन । यसै वर्ष यो फिल्मको हिन्दी रिमेक ‘कबीर सिंह’ प्रदर्शनमा आएको थियो । फिल्ममा विजयको भूमिका अभिनेता शाहिद कपूरले निर्वाहा गरेका थिए । भने, उनको अपोजिटमा कियारा आडवानी थिइन् । फिल्मले बक्सअफिसमा जबरजस्त व्यापार गरेको थियो ।
विजय पछिल्लो पटक फिल्म ‘डियर कमरेड’ मा देखिएका थिए । जसमा उनी एक छात्र नेताको भूमिकामा थिए । फिल्मले खासै राम्रो व्यापार गरेको थिएन । केए वल्लभाले निर्माण गर्ने ‘वल्ड फेमस लभर’ लाई क्रान्ति माधवको निर्देशन गर्दैछन् । यो फिल्ममा राशि खन्ना, क्याथरीन ट्रेसा, ऐश्वर्या राजेश, इजाबेल लेईटलगायतका कलाकारहरुको अभिनय रहनेछ ।
