वीरगन्ज : अख्तियार दुरुपयोग अनुसन्धान आयोग हेटौडाले वीरगन्जबाट प्रधानाध्यापक सहित ६ जनालाई पक्राउ गरेको छ।
अख्तियारको टोलीले एक लाख घुस रकम सहित वीरगन्ज ८ घण्टाघर स्थित गजुरेल गल्लीमा रहेको चिया पसलबाट वीरगन्ज ३१ वेल्वा प्रसौनीमा रहेको श्री नेपाल राष्ट्रिय आधारभूत विद्यालयका प्रधानाध्यापक सचिन्दर कुमार कापर सहित ६ जनालाई पक्राउ गरेको हो।
पक्राउ पर्नेमा विद्यालयका सहायक प्रधानाध्यापक बारा परवानीपुर गाउँपालिका वडा नम्बर १ का मनिर मियाँ, शिक्षक जितपुर सिमरा नगरपालिका वडा नम्बर १० का सुरेश महतो, विद्यालय व्यवस्थापन समितिका सदस्यहरू वीरगन्ज ३१ वेल्वाकै ईलियास मियाँ अन्सारी, सदिया खातुनका श्रीमान् जमिल मियाँ र नजमुदिन मियाँ देवान रहेका छन्।
विद्यालयले गणित शिक्षकको लागि करारमा नियुक्त गर्न विज्ञापन निकालेको थियो । तर अनुदानको कोटामा समेत नियुक्त गर्न एक जनासँग १ लाख घुस रकम लिएको अवस्थामा रंगेहात पक्राउ गरेको आयोग हेटौडाका अधिकृत नर बहादुर चन्दले बताए।
पक्राउ परेका ६ जनालाई आवश्यक अनुसन्धानको लागि हेटौडा लगेको अख्तियारले जनाएको छ ।
