वीरगंज । नारायणी अस्पताल वीरगंजको मेडिक सुरपरिटेन्डेन्ट फेरिए पनि अनियमितता नरोकिने संकेत देखिएको छ । अस्पतालको औषधी सप्लाईको लागि भारतीय नागरिक दीपक अग्रवाल अस्पतालमा आएका नयाँ मेडिकल सुपरिटेण्डेन्ट डा. मदन उपाध्याय सँग औषधी सप्लाईको लागि सेटिङ मिलाएका छन ।
विगतमा अस्पतालमा न्यून गुणस्तरको औषधि सप्लाई गरेर करोडौं कुम्ल्याएका भारतीय नागरिक अग्रवालले मेडिकल सुपरिटेण्डेन्ट उपाध्यायसँग सेटिङ मिलाएर लुट मच्चाउने ग्य्राण्ड डिजाइन बनाएका छन् ।
अस्पतालमा केही गुणस्तरहीन औषधि र अधिकांश बील भर्पाइमात्र पेश गरी ब्रम्हलुट मच्चाउन विगतमा कर्मचारी अशोक श्रीवास्तव संग सेटिङ मिलाएका अग्रवाल अहिले मेडिकल सुपरिटेण्डेन्टलाई समेत प्रलोभनमा पार्न सफल भएका छन् ।
भारतको रक्सौल आश्रमरोडका बासिन्दा अग्रवालले नारायणी अस्पतालमा कमसल औषधि सप्लाई गरेर विगतमा नेपाली जनताको स्वास्थ्यसँग खेलवाड समेत गरेका थिए । उनले एक दर्जनभन्दा बढी नेपालीको नाममा फर्म खोलेर औषधीको सप्लाई धन्धा चलाएर करोडौं आर्जन पनि गरेका छन् ।
अग्रवाले स्थानीयको नाममा नारायणी सर्जिकल, सिटी फर्मा, प्रिमियर इण्टरप्राइजेज, सर्जिकल हाउस, सिटी सर्जिकेन, सिटी डाइलेस्टिकल लगायतका फर्म दर्ता गरेका छन् । उनको कमाउधन्धाको रहस्य खुल्न थालेपछि ती सोझा नेपालीहरु अहिले आफू फसिने हो कि भन्दै चिन्ता गर्न थालेका छन् ।
अस्पतालको तत्कालिन नेतृत्वलाई प्रभावमा पारेर अग्रवालले चलाएको कमाउधन्धा थाहा पाएपछि अस्पतालले उनको औषधि सप्लाई बन्द गरेको थियो । उनको धन्धालाई सहयोग गरेर उनीबाट प्राप्त दक्षिणाबाट गुजरा चलाउने गरेका कर्मचारी श्रीवास्तवलाई स्टोर शाखाबाट हटाएर रेकर्ड शाखामा फालिएको छ ।
डाक्टर उपाध्याय आउने थाहा पाएपछि दीपक अग्रवाल आफ्ना एकजना काठमाडौंमा रहेका साथीमार्फत मेडिकल सुपरिटेण्डेन्टलाई मनाउन राजधानीमै पुगेका थिए । उनीसँग श्रीवास्तव पनि पुगेका थिए । काठमाडौंको गौशालास्थित एउटा होटलमा भएको गोप्य वार्तालापपछि डा. उपाध्यायले अग्रवाललाई सघाउने बचन दिएको समाचार स्रोतले जनाएको छ ।
काठमाडौंमा भएको सेटिङमा अस्पतालको स्टोरमा पुनः अशोक श्रीवास्तवलाई नै ल्याउने र औषधि सप्लाईको नाममा अग्रवालको कमाउ धन्धालाई पुनः दुरुस्त बनााउने अपवित्र समझदारी बनेको बताइएको छ । यसअघि अशोक १० वर्षसम्म सो शाखामा इन्चार्ज बसेर दीपकको ठगी धन्धालाई सघाएका थिए ।
गुणस्तरहीन औषधि र बील मिलाएर विगतमा दीपकले अस्पतालबाट वार्षिक ४ करोड रुपैयाँको भुक्तानी फुत्काउने गरेका थिए ।
नारायणी अस्पताल वीरगंजमा भइरहेको अनियमितता त्यहाँका मेडिकल सुपरिटेण्डेन्ट फेरिए पनि अस्पतालमा भइरहेको भष्ट्रचार उस्तै रहने भएको छ । नयाँ मेडिकल सुपरिटेण्डन्टको रुपमा आएका डा. उपाध्यायसमेत भ्रष्टाचार गर्ने चलेखेलमा लागेका अस्पतालका कर्मचारी स्रोतको आरोप छ ।
