बारा । बाराको परवानीपुर गाउँपालिका ५ नौतनमा निर्माण भएको धर्मशाला विवादका विच प्रदेश नं. २ का भौतिक पूर्वाधार विकास मन्त्री जितेन्द्र सोनलले उदघाटन गरेका छन ।
वडाध्यक्ष रामेश्वर कलबार सहितको स्थानियहरुले धर्मशाला निर्माणमा अनियमितता भएको भन्दै विरोध गरे पछि प्रहरीले बल प्रयोग गरेर उदघाटन गराएको हो । उदघाटन कार्यक्रम विरोध गर्ने क्रममा वडाध्यक्ष सहित ७ जनालाई प्रहरीले पक्राउ समेत गरेको छ ।
गाउँपालिका अध्यक्ष हरिनारायण साहले जबरजस्ती धर्मशालाको उदघाटन गराउन खोजेपछि विरोध भएको थियो । मन्त्री सोनलले विरोधमा उत्रनेलाई पक्राउ गराएको स्थानीयको आरोप छ ।
विरोध गर्ने क्रममा तत्कालिन संघीय समाजवादी पार्टीबाट निर्वाचित वडाअध्यक्ष कलबार, अनेरास्ववियु क्रान्तिकारीका नेता बिबेक गुप्ता, हरिशंकर गुप्ता र रुपेस गुप्ता लगायतकालाई प्रहरीले पक्राउ गरेको छ ।
धर्मशाला निर्माणका लागि ६२ लाख छुट्याइएको थियो । आधा रकम पनि खर्च नगरि निर्माणमा व्यापक अनियमितता गरेको भन्दै स्थानीयले उद्घाटन गर्न नदिने अडान राखेका थिए ।
धर्मशालाको उद्घाटन विहान ८ बजेका लागि तय गरिए पनि झडपको अवस्था आएपछि दिउँसो ३ बजेका लागि सरिएको थियो । झडप हुन नदिन बाक्लो संख्यामा प्रहरी परिचालन गरिएको छ ।
