वीरगन्ज । पर्खाल निर्माणको विषयमा विवाद हुँदा वीरगन्ज महानगरपालिकाको वडा नं. १८ भवानीपुरमा मङ्गलबार गोली चलेको छ । स्थानीय मोहन साहले टयाक्टर राख्ने पक्की टहरा बनाउने क्रममा छिमेकी वृजेश कुमार पटेल संग विवाद हुदा गोली चलेको हो । साहले सडकमै टहरा बनाउन लागेको भन्दै पटेलले अवरोध गर्न खोजेपछि विवाद भएको थियो । विवाद चर्केपछि मोहन साहका छोरा कुन्दन साहले गोली चलाएका हुन् ।
पटेल र साहबीच झगडा हुँदा साहका छोरा कुन्दनलले घरमा राखेको इजाजत प्राप्त १२ बोरको बन्दुक निकालेर गोली चलाएको प्रहरीले जनाएको छ । गोली चले पनि मानवीय क्षति भने नभएको पर्साका प्रहरी उपरीक्षक सोमेन्द्र सिंह राठौरले बताए । गोली चलाउने कुन्दन र उनका बुबा मोहन साहलाई प्रहरीले पक्राउ गरिसकेको र घटनाको विषयमा अनुसन्धान भइरहेको उनले जानकारी गराए ।
घटनास्थलबाट प्रहरीले फायर भएको १ राउण्ड कार्टिज (गोलीको खोका) फेला पारेको छ । गोली चलेको खबर पाएलगत्तै घटना स्थलमा प्रहरी पुगेको थियो । प्रहरीले मोहन साहको घरमा खानतलासी गर्दा एउटा १२ बोर बन्दुक र त्यसमा लाग्ने ४ राउण्ड गोली पनि बरामद गरेको प्रहरीले जनाएको छ ।
