वीरगंज, १४ पुस ।
सशस्त्र प्रहरीको वीरगन्ज भन्सार राजश्व गस्ती टोलीले गएराति भारी परिमाणमा प्रतिबन्धित लागूऔषध इन्जेक्सन सहित एक व्यक्तिलाई पक्राउ गरेको छ । पक्राउ पर्नेमा वीरगन्ज महानगरपालिका बिर्ता जेलरोड निवासी ३९ वर्षीय सन्नी मानन्धर रहेका छन् ।
- Advertisement -
सीमावर्ती भारतीय सहर रक्सौलबाट नेपाल प्रवेश गर्ने क्रममा भन्सार अगाडिबाट मानन्धरलाई प्रतिबन्धित लागुऔषधसहित पक्राउ गरिएको सशस्त्र प्रहरीले जनाएको छ । मानन्धरको साथबाट फेनार्गन ३१० पिस, नुर्फीन ३१० पिस र डाइजोल्याब ३१० पिस गरी इन्जेक्सन ९ सय ३० पिस तथा ५ बोतल कोरेक्स बरामद गरिएको सशस्त्र प्रहरी भन्सार राजश्व गस्ती गुल्मका प्रहरी नायब उपरीक्षक तिलक खड्काले बताए ।
खानतलासीबाट ३० हजार २ सय नेपाली तथा ३ हजार ५ सय ७५ भारतीय रुपैयाँ र दुई थान मोबाइल समेत बरामद गरिएको उपरीक्षक खड्काले जानकारी दिए ।
