वीरगंज, १७ मंसिर ।
नेपाल अपाङ्ग संघ, पर्साको आयोजनामा पर्साको महुवनमा २७ औं अपाङ्गता दिवस मनाइएको छ । “मलाई गणना गर, समावेश गर” नाराका साथ अपाङ्गता भएका व्यक्तिहरुको सशक्तिकरण तथा समावेशिता समानताको सुनिश्चिता भन्दै सखुवा प्रसौनी गाउँपालिकाको महुवनमा एक कार्यक्रमको आयोजना गरी २७ औं अपाङ्गता दिवस मनाइएको हो ।
अपाङ्ग संघ, पर्साका अध्यक्ष शम्भु प्रसाद पासवानको सभापतित्वमा र पर्साका प्रहरी उपरिक्षक रेवती ढकालको प्रमुख आतिथ्यतामा भएको कार्यक्रममा गायिका अंजु पंत, ज्योति सम्राट पुरुषोत्म दुवे, चेली कृषी सहकारीका अध्यक्ष कमला घिमिरे, सुरक्षित ऋण बचत तथा सहकारीका अध्यक्ष रामकुमार घिमिरे लगायतकाको सहभागिता रहेको थियो ।
श्री ने.रा.मा.वि. महुवनको प्राङ्गणमा भएको कार्यक्रममा अंजु पंत फाउन्डेसन काठमाण्डौको तर्फबाट २० वटा फाइबर कमबल र ८ वटा ट्रायक सुट समेत वितरण गरिएको थियो । विद्यालयमा रहेका ८ जना अंपाङ्ग बालबालिकाहरुको लागि कमबल र ट्रयाक सुट फाउन्डेसनले सहयोग गरेको हो । यस्तै आइतबार फाउन्डेसनले वीरगंज कारागारमा रहेको समता विद्यालयका विद्यार्थीहरुलाई पनि सहयोग गरेको थियो ।
