मेघराज राय\जिराभवानी, २४ कार्तिक ।
तिहार र छठमा पटका पड्काउन प्रतिबन्ध लगाईएपनि कार्यान्वयन हुन सकेन । भारतिय सिमावर्ती बजार बाट लुकाईछिपाई ल्याएका पटका अहिले पर्साको ग्रामीण क्षेत्रको सवै बजारहरुमा छ्याप्छ्याप्ती पाईन्छ ।प्रहरीले पटका नियन्त्रण गर्नका लागि सिमावर्ती क्षेत्रमा सक्रियता समेत बढाएको थियो ।
सक्रियता संगै सिमा क्षेत्रबाट नेपाल प्रहरी र शसस्त्र प्रहरीले पटकाहरु समेत बरामद गरेर नष्ट गरेको थियो । प्रशासनले पटका खरिद विक्रि गर्न र पड्काउन प्रतिबन्ध लगाएपनि अहिले बजारहरुमा ब्यापारीहरुले लुकाई छिपाई पटका विक्रि गरिहेका छन् भने बालबालिका तथा यूवाहरु समेत चोक चोकमा पटका पड्काएर रमाईरहेका छन् ।
जथाभावी रुपमा पटका पड्काउदा अंगभंग हुने देखि आंखाको ज्योति सम्म गुम्ने खतरा हुनेगर्दछ । पर्सामा पटका पड्काउदा आगलागिका घटनाहरु समेत घट्ने गरेका छन् । तिहार सकिए पनी छठ नजिकिदै जांदा पटका आतंक पनि बढ्दै गएको छ । सांझ परे संगै लगातार रुपमा पड्कीने पटकाको आवाजले दिक्क बनाउने गरेको छ ।
रातको समयमा समेत पटका पड्काउदा घरमा सुत्ने बस्नेहरुले निदाउन समेत नपाईने गुनासो गर्दछन् । पटका पड्काउनका लागि रोक लगाउने प्रशासन खुल्लेआम पटका पड्काईरहदा भने प्राय मुखदर्शक बन्ने गरेको छ । नत पटका किनबेच गर्ने ब्यापारीहरुलाई अनुगमन गर्दछ नत पड्काउनेहरुलाई कारबाहि गर्दछ ।
अभिभावकहरुले पनि आफ्ना बालबालिका हरुलाई पटका पड्काउन रोक लगाउने गरेका छन् । जताततै पड्कीने पटकाले आतंक नै मच्चाएको छ । जथाभावी रुपमा पटका पड्काउदा अहिले धान स्याहार्ने सिजनमा आगलागिका घटना हुन सक्ने जोखीम समेत बढ्दै गैरहेको छ ।
