पर्सा, १० कात्तिक । नेपालबाट गिटी तस्करी गरी भारत पु¥याउने तयारीमा रहेका १३ वटा ट्याक्टर पक्राउ परेको छ । पर्साका प्रमुख जिल्ला अधिकारी लोकनाथ पौड्यालको टोलीले गिटीसहित ट्याक्टर नियन्त्रणमा लिएको हो । शुक्रवार बिहान करिब ९ बजे प्रजिअ नेतृत्वको टोली सीमा अनुगमन गर्दै छिपहरमाई गाउँपालिका पुगेको थियो । सो गाउँपालिकाको वडा नं २ स्थित टिहुकी अन्तर्गत नेपाल–भारत दशगजाछेउमैं गिटी लोड अवस्थामा १३ वटा ट्याक्टरको ढाला देखिएपछि उक्त गिटीसहितको ढाला नियन्त्रणमा लिएको टोलीका सहभागीहरूले बताए ।
इन्जिनबिनाको ढाला र ढालामा पनि कुनै नम्बर अङ्कित नभएकोले पनि गिटी भारततर्पm लैजाने तयारी भएको सहजै अनुमान गर्न सकिन्थ्यो । तस्करहरूले दिउँसो लोड गर्ने र रातको समयमा सीमा कटाउने गरेको टिहुकीका बासिन्दाहरू बताउँछन् ।नियन्त्रणमा लिइएको ढाला प्रहरी चौकी टिहुकीमा राखिएको छ । सो ढालाको इन्जिन तथा धनी पत्ता लगाउने प्रयास भइरहेको जिल्ला प्रशासन स्रोतले जनाएको छ ।
मकवानपुरको मनहरीबाट आयात गरिने गिटी नेपालभित्र वैधानिक मानिन्छ । नेपाल सीमा क्षेत्रभित्र प्रतिसिएफटी ५३ रुपैया पर्छ । सोही गिटी सीमा कट्नेबित्तिकै भारततर्पm प्रतिसिएफटी ५८ भारु मूल्य छ । एक ट्याक्टरमा २ सय सिएफटी गिटी ढुवानी हुने भएकोले प्रतिट्याक्टर सीमावारि नेरु १० हजार ६०० र सीमापारि ११ हजार ६ सय भारु मूल्य पर्छ । यस कारण नेपाली गिटी तस्करी गरी भारततर्पm पुग्ने गरेको छ ।
तस्कर समूहले अमलेखगंजबाट ल्याएर पोखरिया, मुडली, लङ्गडी, हरिहरपुरलगायतका स्थानमा गिटी डिपो गरिराख्ने र रातको समय पारेर सीमा कटाउने गरेका छन् । पेशेवर तस्करहरूले नम्बर नभएको ढालामा गिटी लोड गरेर सीमासम्म नेपाली नम्बरको इन्जिनले पु¥याउने र सीमाबाट भारतीय नम्बरको इन्जिनले लिएर जाने गरेको नाम नबताउने शर्तमा एक ट्याक्टर चालकले प्रतीकलाई बताए ।
सीमा क्षेत्रका प्रहरी एकाइहरूसँगको मिलेमतोमा मात्रै तस्करहरूले काम गर्ने उनले खुलासा गरे । “प्रहरी नमिलाए त नम्बरविहीन ढाला पक्राउ गरिहाल्छ नि, सीमा कटाउनै पाइन्न,” उनले थपे । प्रहरी चौकी बुडगाई, टिहुकी, भिस्वा, मिर्जापुर, आशवारी, सबैठवा नाकाबाट हरेक रात ५० टिपभन्दा बढी गिटी भारततर्पm तस्करी हुने गरेको समाचार स्रोतको दाबी छ ।
यसैबीच, प्रहरी उपरीक्षक रेवती ढकालले सो क्षेत्रका प्रहरीचौकी प्रमुखहरूलाई जिल्लामा बोलाएर गिटी तस्करीबारे सोधपुछ गरेका छन् । प्रहरीको मिलेमतोमा तस्करी भइरहेको निष्कर्ष निकाल्दै प्रउ ढकालले शुक्रवारबाटै छानबिन प्रक्रिया अगाडि बढाएको जिप्रका स्रोतले जनाएको छ ।
