वीरगंज १० कात्तिक । हतियारसहित नेपाल प्रवेश गर्दै गरेका तीन भारतीय नागरिकलाई सशस्त्र प्रहरीले वीरगन्ज नाकाबाट पक्राउ गरेको छ। शुक्रबार साँझ वीरगन्ज महानगरपालिका १६ स्थित वीरगन्ज भंसारको मूल गेटबाट चेकजाँचको क्रममा सशस्त्र प्रहरीले ती तीन भारतीय नागरिकलाई हतियार सहित पक्राउ गरेको हो।
ती भारतीयको साथबाट आरपी २२३६५९ नम्बरको ७ दशमलब ६५ एमएम अथवा ०.३२ इन्चको एक एनपीबोर पिष्टल, सोमा लाग्ने ८ राउण्ड गोली र २ वटा म्याग्जिनसमेत फेला परेको राजश्व तथा भंसार गस्ती गुल्मका निमित्त गुल्मपति पदम खड्काले बताए।
पक्राउ परेका व्यक्तिहरूमध्ये भारतको पूर्वी चम्पारण मोतिहार जिल्ला रामगढवाका २७ वर्षीय अवधबिहारी प्रसादको साथबाट सो हतियार बरामद भएको हो। उनको सहयोगीको भूमिकामा सोही ठाउँका ३७ वर्षीय उमेश प्रसाद गुप्ता रहेको र ती दुवैलाई लिएर आएको स्कार्पियो चालक सोही ठाउँका ओम प्रकाश पासवानलाई पनि सशस्त्र प्रहरीले गाडीसहित नियन्त्रणमा लिएको हो।
उनीहरूसँग फेला परेको हतियार, त्यसमा लाग्ने गोली र म्याग्जिन सहित उनीहरूलाई जिल्ला प्रहरी कार्यालय पर्सामा बुझाइएको राजश्व तथा भंसार गस्ती गुल्मले जनाएको छ ।
बी आर ०५ पीए ६१७७ नम्बरको सेतो स्कार्पियो गाडीमा चडेर नेपाल आउँदै गरेका उनीहरूले भंसार अगाडि नै गाडी रोकी भंसार अनुमतिपत्र लिने क्रममा शंका लागि चेकजाँच गर्दा सो हतियार त्यसमा लाग्ने गोली र म्याग्जिन फेला परेपछि राजश्व तथा भंसार गस्ती गुल्मले अवैध हतियारसहित तीनै जनालाई नियन्त्रणमा लिएको निमित्त गुल्मपति तथा सशस्त्रका प्रहरी निरिक्षक खड्काले बताए।
