वीरगञ्ज । प्रहरीले वीरगञ्जका विभिन्न स्थानबाट भन्सार छली गरी ल्याइएका १० लाख ६ हजार ७६० रुपैयाँ बराबरका मोबाइल, शृङ्गारका सामान तथा स्याउ बरामद गरेको छ।
जिल्ला प्रहरी कार्यालय पर्साका अनुसार वीरगञ्ज महानगरपालिका–१४ गण्डकचोकबाट भन्सार छली गरी ल्याइएका विभिन्न कम्पनीका चार थान मोबाइल, कस्मेटिक सामान तथा स्याउ बरामद गरिएको हो। बरामद सामानको मूल्य ५ लाख ५२ हजार २१० रुपैयाँ रहेको प्रहरीले जनाएको छ।
त्यस्तै, वीरगञ्ज–१६ स्थित रजतजयन्ती चोकबाट ४ लाख ५४ हजार ५५० रुपैयाँ बराबरका शृङ्गारका सामान तथा स्याउ बरामद गरिएको छ।
बरामद गरिएका सबै सामान आवश्यक कारबाहीका लागि वीरगञ्ज भन्सार कार्यालय, पर्सामा बुझाइएको जिल्ला प्रहरी कार्यालय पर्साका प्रहरी नायब उपरीक्षक चक्रबहादुर मल्लले जानकारी दिए।
