वीरगंज । पर्साको पटेर्वा सुगौली गाउँपालिका–१ स्थित प्रसिद्ध धार्मिक तीर्थस्थल भाथाधाम (बाबा दुधेश्वरनाथ महादेव) मा ट्र्याक्टरबाट खसेका एक किशोरको सोही ट्र्याक्टरले किचेर मृत्यु भएको छ।
मृत्यु हुनेमा बाराको विश्रामपुर गाउँपालिका–५ इटियाही टोल निवासी अजय रामका छोरा करिब १७ वर्षीय आकाश राम रहेका छन्।
एक महिने साउने मेला समापन भएपछि मंगलबार बिहान मेलामा थापिएका पसलका सामान लिन जाने क्रममा राम ट्र्याक्टरबाट खसेका थिए। ट्र्याक्टरबाट खसेपछि उनी सोही ट्र्याक्टरको चक्कामुनि परी घटनास्थलमै मृत्यु भएको प्रहरीले जनाएको छ।
प्रहरीका अनुसार दुर्घटनाका बेला ट्र्याक्टरमा चालक र मृतक किशोर गरी दुई जना मात्रै सवार थिए। उनीहरू नाताले काका–भतिजा रहेको प्रारम्भिक जानकारी प्राप्त भएको छ।
ट्र्याक्टर चारभैया पोस्टबाट करिब दुई किलोमिटरभित्र पुगेपछि किशोर ट्र्याक्टरबाट खसेका थिए। त्यसपछि चक्काले किच्दा उनको मृत्यु भएको प्रारम्भिक अनुसन्धानबाट खुलेको इलाका प्रहरी कार्यालय पटेर्वा सुगौलीले जनाएको छ।
घटना मंगलबार बिहान करिब ७ बजेको समयमा भएको बताइएको छ। बाटोमा रगत देखेपछि भाथाधामतर्फ जाँदै गरेका श्रद्धालुले नेपाली सेनालाई घटनाबारे जानकारी गराएका थिए। त्यसपछि मेला व्यवस्थापन समितिका अध्यक्ष अल्खदेव चौधरी घटनास्थलमा पुग्दा किशोर मृत अवस्थामा भेटिएपछि प्रहरीलाई खबर गरिएको थियो।
सूचना पाएलगत्तै इलाका प्रहरी कार्यालय पटेर्वा सुगौलीका प्रहरी निरीक्षक समुन्नत अधिकारीको नेतृत्वमा प्रहरी टोली घटनास्थल पुगेको थियो।
प्रहरी निरीक्षक अधिकारीका अनुसार प्रारम्भिक अनुसन्धानमा ट्र्याक्टरबाट खसेपछि चक्काले किचेर किशोरको मृत्यु भएको देखिएको छ। घटनापछि चालक ट्र्याक्टरसहित फरार भएकाले उनको खोजी भइरहेको प्रहरीले जनाएको छ।
मृतकको शव पोस्टमार्टमका लागि वीरगन्जस्थित नारायणी अस्पताल पठाइएको छ । प्रहरीले घटनाबारे थप अनुसन्धान गर्दै फरार चालकको खोजी गरिरहेको जनाएको छ ।
