वीरगंज । जिल्ला प्रहरी कार्यालय पर्साले लागू औषध सेवनकर्ता खोजी तथा सुधार महाअभियान अन्तर्गत लागूऔषधसहित ४ जनालाई पक्राउ गरेको छ।
प्रहरीका अनुसार मिति २०८३ वैशाख २८ गते वीरगंज महानगरपालिका–१६ शंकराचार्य गेटस्थित चेकपोइन्टमा भारतबाट नेपालतर्फ आउने पैदल यात्री तथा सवारी साधनहरूमा चेकजाँच गर्ने क्रममा उनीहरू पक्राउ परेका हुन् ।
पक्राउ पर्नेहरूमा २६ वर्षीय पैयाल अन्सारी, ३४ वर्षीय संजय साह र २१ वर्षीय विशाल यादव रहेका छन् । उनीहरूको साथबाट खैरो हिरोइन र चरेस बरामद गरिएको प्रहरीले जनाएको छ ।
प्रहरीले पैयाल अन्सारी र संजय साहबाट ०.१० मिलिग्राम खैरो हिरोइन तथा ४ ग्राम चरेस बरामद गरेको जनाएको छ । त्यसैगरी संजय साहकै साथबाट थप ३ ग्राम ४२ मिलिग्राम खैरो हिरोइन फेला परेको थियो भने विशाल यादवबाट ०.४३ मिलिग्राम खैरो हिरोइन बरामद गरिएको प्रहरीले जानकारी दिएको छ ।
पक्राउ परेका चारै जनामाथि लागूऔषध नियन्त्रण ऐन अन्तर्गत आवश्यक अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
