वीरगंज । पर्सा जिल्ला अदालतले “कानून दिवस २०८३” को अवसरमा सम्पूर्ण नेपाली दाजुभाइ तथा दिदीबहिनीहरूमा हार्दिक शुभकामना व्यक्त गरेको छ ।
प्रधान न्यायालय ऐन, २००८ विक्रम संवत् २००९ वैशाख २६ गतेबाट लागू भएको ऐतिहासिक दिनको सम्झनामा प्रत्येक वर्ष वैशाख २६ गतेलाई कानून दिवसका रूपमा मनाइँदै आएको उल्लेख गरिएको छ ।
अदालतद्वारा जारी शुभकामना सन्देशमा नेपालमा विधिको शासन, न्याय, समानता र संवैधानिक मूल्यमान्यताको संरक्षण तथा प्रवर्द्धन गर्ने उद्देश्यसहित यो दिवस मनाइने गरिएको जनाइएको छ । कानून दिवस केवल औपचारिक कार्यक्रम मात्र नभई नागरिक अधिकार, कर्तव्य, न्यायिक स्वतन्त्रता तथा लोकतान्त्रिक मूल्यहरूको संरक्षणप्रति सामूहिक प्रतिबद्धता व्यक्त गर्ने महत्वपूर्ण अवसर भएको पनि उल्लेख गरिएको छ ।
यस अवसरले न्याय सम्पादन गर्ने निकाय, कानून व्यवसायी, सुरक्षाकर्मी, राष्ट्रसेवक कर्मचारी तथा सम्पूर्ण नागरिकलाई आफ्नो जिम्मेवारी इमानदारी, निष्पक्षता र उत्तरदायित्वका साथ निर्वाह गर्न प्रेरणा मिलोस् भन्ने अपेक्षा गरिएको छ ।
त्यसैगरी समाजमा विद्यमान अन्याय, विभेद, हिंसा, भ्रष्टाचार तथा दण्डहीनताको अन्त्य गर्दै विधिको सर्वोच्चता कायम गर्न सबै पक्षबीच सहकार्य र पारदर्शिता अझ सुदृढ हुनुपर्नेमा जोड दिइएको छ ।
अदालतले स्वतन्त्र न्यायपालिका, विधिको शासन, संवैधानिक सर्वोच्चता तथा लोकतान्त्रिक मूल्य मान्यताप्रति प्रतिबद्ध रहँदै निष्पक्ष र सक्षम न्याय प्रणालीको प्रवर्द्धन तथा न्यायमा सबैको सहज पहुँच सुनिश्चित गर्नुपर्ने आवश्यकता औंल्याएको छ ।
अन्त्यमा, प्राकृतिक न्यायको सिद्धान्तको पूर्ण पालना गर्दै न्यायिक निर्णय कार्यान्वयनलाई पनि उत्तिकै महत्वपूर्ण मान्दै सम्बन्धित निकाय, नागरिक समाज, कानून व्यवसायी, जनप्रतिनिधि तथा सम्पूर्ण सरोकारवालाको सहकार्य आवश्यक रहेको पर्सा जिल्ला अदालतका श्रेस्तेदार प्रभाकर कुमार मल्लिकले जानकारी दिए ।
