वीरगंज । पर्सा जिल्लाको पर्सागढी नगरपालिकाअन्तर्गत बढनियारमा दोस्रो साता पनि “घरदैलोमा डाक्टर” कार्यक्रम सम्पन्न भएको छ । प्रभु हस्पिटल वीरगंजको सहकार्य र जुनतारा बचत तथा ऋण सहकारी संस्थाको आयोजनामा भएको कार्यक्रममा स्थानीय २५० जनाले निशुल्क स्वास्थ्य सेवा प्राप्त गरेका छन् ।
कार्यक्रममा १९० महिला र ६० पुरुष गरी कुल २५० जनाको स्वास्थ्य जाँच, सुगर किटमार्फत सुगर परीक्षण तथा निशुल्क औषधि वितरण गरिएको आयोजकले जनाएको छ । आर्थिक रूपमा कमजोर, पहुँचविहीन तथा अस्पतालसम्म पुग्न नसक्ने बिरामीलाई घरदैलोमै सेवा पुर्याउने उद्देश्यसहित कार्यक्रम सञ्चालन गरिएको प्रभु अस्पतालले जनाएकाे छ ।
स्थानीय बलिराम शुक्लाको समन्वय तथा जुनतारा सहकारी संस्थाकी अध्यक्ष मञ्जु क्षेत्रीको अध्यक्षतामा सम्पन्न कार्यक्रममा प्रभु अस्पतालकी स्त्रीरोग विशेषज्ञ डा. लक्ष्मी थापा गुप्ता प्रमुख अतिथि रहनुभएको थियो । त्यस्तै वरिष्ठ फिजिसियन डा. रवि रञ्जन साहको विशेष उपस्थितिमा बिरामीहरूको स्वास्थ्य परीक्षण तथा परामर्श गरिएको थियो ।
डा. लक्ष्मी थापाले प्रभु हस्पिटलले आगामी हप्ताहरूमा पनि दुर्गम तथा पिछडिएका क्षेत्रमा पुगेर घरदैलो स्वास्थ्य शिविर सञ्चालन गर्ने योजना रहेको जानकारी दिँदै दीर्घरोगी, जेष्ठ नागरिक तथा महिला सम्बन्धी गम्भीर रोगका बिरामीलाई थप सहयोग गरिने बताइन् ।
कार्यक्रमका प्रमुख दिलीप राज कार्कीले अस्पताल केवल व्यवसायिक नभई सेवा–मुखी हुनुपर्ने बताउँदै जनतासँग हातेमालो गर्दै यस्ता कार्यक्रम निरन्तर सञ्चालन गर्ने प्रतिबद्धता व्यक्त गर्नुभयो ।
विशेष पहलकर्ता पत्रकार तथा सामाजिक अभियान्ता बलिराम शुक्लाले आगामी दिनमा पनि यस्ता कार्यक्रमलाई निरन्तरता दिन सहकार्य गर्ने बताए । त्यसैगरी अध्यक्ष मञ्जु क्षेत्रीले सामाजिक स्वास्थ्य सेवामा निरन्तर सहयोग र समन्वय गर्ने प्रतिबद्धता व्यक्त गरिन् ।
