काठमाडौं । अख्तियार दुरुपयोग अनुसन्धान आयोगले प्रहरी वृत्त मालीगाउँ, काठमाडौंमा कार्यरत प्रहरी नायव निरीक्षक (सई) दिनेश राउतविरुद्ध घुस/रिसवत लिएको आरोपमा विशेष अदालत काठमाडौंमा आरोपपत्र दायर गरेको छ।
आयोगका अनुसार बैंकिङ्ग कसुर (चेक बाउन्स) सम्बन्धी मुद्दामा जाहेरवालाको रकम फिर्ता दिलाइदिने तथा मुद्दा मिलापत्र गराइदिने भन्दै सई राउतले सेवाग्राहीसँग घुस माग गरेका थिए । प्राप्त सूचना तथा उजुरीका आधारमा आयोगको टोलीले उनलाई सेवाग्राहीबाट २० हजार रुपैयाँ घुस लिइसकेको अवस्थामा नियन्त्रणमा लिएको जनाएको छ ।
अनुसन्धानका क्रममा सई राउतले मुद्दाको प्रक्रिया सहजीकरण गरिदिने नाममा विभिन्न बहाना बनाई सेवाग्राहीलाई दुःख हैरानी दिँदै २० हजार रुपैयाँ घुस लिएको पुष्टि भएको आयोगले जनाएको छ ।
उक्त कार्य भ्रष्टाचार निवारण ऐन, २०५९ अन्तर्गतको कसुर ठहर गर्दै आयोगले बिगो २० हजार रुपैयाँ कायम गरी सोही बराबर जरिवाना तथा कैद सजायको मागदाबी सहित शुक्रबार विशेष अदालत काठमाडौंमा आरोपपत्र दायर गरिएकाे आयोगका प्रवक्ता सुरेश न्यौपानेले जानकारी दिए ।
