वीरगंज । पर्साका विभिन्न स्थानीय तहहरूले सार्वजनिक तथा सरकारी जग्गा अतिक्रमण हटाउन कडा चेतावनी दिएका छन् । धोबिनी, जिराभवानी र पकहाँमैनपुर गाउँपालिकाले छुट्टाछुट्टै सूचना जारी गर्दै अतिक्रमण हटाउन समयसीमा तोकेका हुन् ।
धोबिनी गाउँपालिकाले गृहमन्त्रालय र जिल्ला प्रशासन कार्यालय पर्साको निर्देशनअनुसार सार्वजनिक, सरकारी, ऐलानी, पर्ती जग्गा, सडक, खोला, नाला, विद्यालय, पोखरी, मठ–मन्दिर, मस्जिद, इदगाह, पार्क तथा खुला क्षेत्रलगायतमा भएको अतिक्रमण हटाउने प्रक्रिया अघि बढाउने जनाएको छ । गाउँपालिकाले ३५ दिनभित्र स्वेच्छाले अतिक्रमण हटाउन आग्रह गर्दै अन्यथा कानूनी प्रक्रिया अपनाइने र खर्चसमेत अतिक्रमणकर्ताबाट असुल गरिने जनाएको छ ।
त्यसैगरी, जिराभवानी गाउँपालिकाले पनि सार्वजनिक तथा ऐलानी जग्गामा निर्माण गरिएका संरचना १५ दिनभित्र हटाउन निर्देशन दिएको छ । तोकिएको समयभित्र अटेर गरेमा कानुनबमोजिम कारबाही गरिने गाउँपालिकाले एक सूचना मार्फत चेतावनी दिएको छ ।
पकहाँ मैनपुर गाउँपालिकाले पनि मन्त्रिपरिषद्बाट स्वीकृत शासकीय सुधार कार्ययोजनाअनुसार सार्वजनिक तथा सरकारी जग्गाको संरक्षण अभियान अन्तर्गत सूचना जारी गर्दै १५ दिनभित्र अतिक्रमण हटाउन आग्रह गरेको छ । गाउँपालिकाले समयसीमा नाघेमा आफैं अतिक्रमण हटाइने र त्यसको खर्च सम्बन्धित व्यक्तिबाट असुल गरिने जनाएको छ ।
तीनवटै स्थानीय तहले सार्वजनिक सम्पत्तिको संरक्षणमा सहयोग गर्न सर्वसाधारणसँग अपिल समेत गरेका छन् ।
