कलैया । बारा प्रहरीले पथलैयाबाट ठूलो परिमाणमा गाँजासहित दुई जनालाई नियन्त्रणमा लिएको छ ।
जिल्ला प्रहरी कार्यालय बाराका अनुसार आइतबार राति करिब ८:२० बजे जितपुरसिमरा उपमहानगरपालिका–१ पथलैया चोकस्थित ट्राफिक अफिस अगाडि चेकिङका क्रममा हेटौँडाबाट पथलैया तर्फ आउँदै गरेको बा.प्र.०३–००३ प ५७६४ नम्बरको स्कुटर रोकी जाँच गर्दा २१ केजी गाँजा बरामद गरिएको हो ।
प्रहरी चौकी पथलैयाबाट प्रहरी वरिष्ठ नायब निरीक्षक युवराज दाहालको कमाण्डमा खटिएको टोलीले स्कुटरको अगाडि खुट्टा राख्ने भागमा कालो प्लास्टिकले बेरेर लुकाईछिपाई ल्याइएको अवस्थामा गाँजा फेला पारेको जनाएको छ ।
घटनामा संलग्न रहेको आरोपमा मकवानपुर छतिवन गाउँपालिका–४ का १६ वर्षीय सुरेन्द्र गोले (चालक) र मकवानपुर राक्सिराङ गाउँपालिका–७ का १८ वर्षीय सलमान गुरुङ (पछाडि बस्ने) लाई नियन्त्रणमा लिइएको छ ।
पक्राउ परेका दुवै जनामाथि बारा जिल्ला अदालतबाट म्याद थप गरी थप अनुसन्धान भइरहेको जिल्ला प्रहरी कार्यालय बाराका निमित्त सूचना अधिकारी प्रहरी निरीक्षक सुरेशराज भट्टले जानकारी दिएका छन् ।
