वीरगंज । सिर्सिया नदीको बढ्दो प्रदूषण र अतिक्रमणप्रति गम्भीर चिन्ता व्यक्त गर्दै स्थानीय अभियन्ताले प्रधानमन्त्री बालेन्द्र साहलाई खुला पत्र मार्फत तत्काल हस्तक्षेप गर्न माग गरेका छन् । वीरगंजका अभियन्ता ओमप्रकाश सरार्फले लेखेको उक्त पत्रमा सिर्सिया नदीलाई प्रदूषणमुक्त तथा अतिक्रमणमुक्त बनाउन ठोस पहल गर्न आग्रह गरिएको छ ।
पत्रमा सिर्सिया नदी वीरगंज महानगर र आसपासका हजारौं नागरिकको जीवनसँग प्रत्यक्ष जोडिएको ‘लाइफलाइन’ भए पनि अहिले अत्यन्तै प्रदूषित अवस्थामा पुगेको उल्लेख गरिएको छ । नदीमा औद्योगिक ढल, रासायनिक फोहोर तथा अव्यवस्थित फोहोर व्यवस्थापनका कारण गम्भीर वातावरणीय संकट सिर्जना भएको जनाइएको छ ।
अभियन्ता सरार्फका अनुसार नदीको प्रदूषण सीमापार भारतको रक्सौलसम्म फैलिएको छ, जसले अन्तर्राष्ट्रिय सम्बन्धमा समेत नकारात्मक असर पारिरहेको छ । विगतमा पवित्र मानिएको नदी अहिले ‘जहर’मा परिणत भएको उल्लेख गर्दै उनले यसको संरक्षणमा ढिलाइ भए थप भयावह अवस्था सिर्जना हुने चेतावनी दिएका छन् ।
पत्रमा स्थानीय बासिन्दाले दुर्गन्ध, स्वास्थ्य समस्या, कृषि उत्पादनमा गिरावट, भूजल प्रदूषण जस्ता समस्या भोग्नुपरेको उल्लेख गरिएको छ । नदी किनारका समुदायहरू सबैभन्दा बढी प्रभावित बनेका छन् ।
अभियन्ताले एक दशकभन्दा बढी समयदेखि नागरिकस्तरबाट आन्दोलन, संघर्ष तथा सत्याग्रह गर्दै आए पनि समस्या समाधान हुन नसकेको गुनासो गरेका छन्। कानुनी पहल गर्दा समेत अपेक्षित सुनुवाइ नभएको उनको भनाइ छ ।
प्रधानमन्त्रीसमक्ष पेश गरिएका मागहरूमा उद्योगबाट नदीमा मिसाइने ढल र रासायनिक फोहोरमा कडा निगरानी, नदी सफाइका लागि राष्ट्रिय अभियान सञ्चालन, आधुनिक फोहोर प्रशोधन केन्द्र निर्माण, प्रदूषण गर्ने उद्योगमाथि कानुनी कारबाही, तीन तहका सरकारबीच समन्वय, नदी किनार अतिक्रमण हटाउने र हरियाली प्रवर्द्धन तथा नदीलाई पर्यटकीय पूर्वाधारका रूपमा विकास गर्ने लगायतका विषय समावेश छन् ।
सिर्सिया नदीको संरक्षणलाई वीरगंज मात्र नभई समग्र राष्ट्रको वातावरण, जनस्वास्थ्य र भावी पुस्तासँग जोडिएको विषय भएको उल्लेख गर्दै सरार्फले सरकारबाट शीघ्र ठोस कदम चालिने अपेक्षा व्यक्त गरेका छन् । साथै माग सम्बोधन नभए नागरिकस्तरको आन्दोलन निरन्तर जारी रहने चेतावनी समेत दिएका छन् ।
