वीरगंज । वीरगंज महानगरपालिका–२ मा अवस्थित ऐतिहासिक छपकैया पोखरीको संरक्षणमा महत्वपूर्ण भूमिका निर्वाह गर्ने स्थानीय अभियन्ता जफरुल मिया (जफर) लगायतका अगुवाहरूलाई वीरगंज महानगरपालिकाले सम्मान गरेको छ।
वर्षौंदेखि भू–माफियाको अतिक्रमणको जोखिममा परेको करिब ४ बिघा क्षेत्रफलमा फैलिएको यस सार्वजनिक जलाशयलाई जोगाउन जफरुल मिया र उनको टोलीले निरन्तर कानुनी, सामाजिक तथा जनचेतनामूलक संघर्ष गर्दै आएका थिए ।
यस अभियानमा देखाएको साहस, प्रतिबद्धता र योगदानको कदर गर्दै महानगरपालिकाले आयोजित कार्यक्रममा जफरसहित अभियानमा सक्रिय करिब ४० जना स्थानीयलाई सम्मान गरिएको हो। कार्यक्रममा महानगर प्रमुख राजेशमान सिंहले सम्मानपत्र प्रदान गर्दै सार्वजनिक सम्पत्ति संरक्षणमा उनीहरूको अग्रसरता समाजका लागि प्रेरणादायी भएको उल्लेख गर्नुभयो ।
कार्यक्रममा बोल्दै जफरुल मियाले प्राप्त सम्मानप्रति आभार व्यक्त गर्दै संघर्षको यात्रामा महानगरपालिकाबाट प्राप्त साथ र सहयोगप्रति धन्यवाद दिनुभयो। साथै, सार्वजनिक सम्पत्तिको संरक्षणमा सबै नागरिक सचेत र जिम्मेवार बन्नुपर्ने आवश्यकता औंल्याउनुभयो।
यसअघि गत चैत १७ गते पर्सा जिल्ला अदालतका न्यायाधीश माधव घिमिरेको इजलासले गरेको ऐतिहासिक फैसलाले छपकैया पोखरीलाई भू–माफियाको कब्जाबाट मुक्त गरिदिएको थियो। अर्बौँ मूल्य बराबरको उक्त जलाशयमाथि भएको अवैध दाबी खारेज गर्दै अदालतले यसलाई सार्वजनिक सम्पत्तिको रूपमा कायम गरेको हो ।
यस निर्णयका लागि जफरुल मिया सहितको टोलीले एक दशकभन्दा बढी समय संघर्ष गरेको थियो। उनीहरूले २०३१ सालदेखिका नगर पञ्चायतका ठेक्का रसिद, बोर्ड बैठकका निर्णयहरू तथा अन्य महत्वपूर्ण ऐतिहासिक दस्तावेजहरू संकलन गरी अदालतमा प्रमाणका रूपमा पेश गरेका थिए, जसले पोखरीको सार्वजनिक हैसियत पुष्टि गर्न निर्णायक भूमिका खेलेको थियो ।
छपकैया पोखरी संरक्षण अभियानले केवल एउटा जलाशय जोगाएको मात्र नभई सार्वजनिक सम्पत्तिको रक्षा गर्न नागरिकस्तरबाट पनि प्रभावकारी पहल सम्भव हुने सशक्त सन्देश दिएको छ।
